Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 227 Hüküm no: 201 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın daha önce alacağı olduğu Seyyid Ahmed ile sulh olup ödenmeyen sulh parasını Seyyid Ahmed’in ödemesi Ma‘rûz Medîne-i Üsküdar’da Debbâğlar mahallesinde sâkin Mehmed Ağa b. Hüseyin nâm kimesnenin karındaşı ve tarafından ber-vech-i âtî vekîl olduğu el-Hâc Ali b. Osman ve es-Seyyid Hasan b. İsmail nâm kimesneler şehâdetleriyle sâbit olan Hasan nâm kimesne medîne-i mezbûrede mahfil-i bâbda meclis-i şer‘-i hatîrde es-Seyyid Ahmed b. Mustafa mahzarında mezbûr es-Seyyid Ahmed bin yüz doksan sekiz senesi Zilka‘dedeti’ş-şerîfe’sinin on dokuzuncu günü târihiyle müverrah bir kıt‘a temessük mantûkunca karındaşım müvekkil-i mezbûr yedinden iktirâz ve kabz ve umûruna sarfla istihlâk eylediği iki yüz elli beş guruş hakkının iki guruşunu yedinden ahz ve istifâ ve iki yüz elli üç guruşu zimmetinde bâkī kalmağla taleb ve da‘vâ eylediğimde beynimize muslihûn tavassut edip beni da‘vâ-yı mezkûremden mezbûr es-Seyyid Ahmed ile iki yüz guruş bedel mukābelesinde sulh eylediklerinde ben dahi sulh-ı mezkûru kabûl ve ziyâde müdde‘âm olan elli üç guruşa müte‘allika âmme-i de‘âvîden mezbûr es-Seyyid Ahmed’in zimmetini ibrâ ve ıskāt etmiş idim lâkin mezbûr es-Seyyid Ahmed bedel-i sulh-ı merkūm iki yüz guruşu hâlen bana edâ etmeyip zimmetinde olmağla taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı merkūm iki yüz guruşun edâsıyla mezbûr es-Seyyid Ahmed şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 19 min-Şevvâl sene 1204