Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 228 Hüküm no: 202 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Bölükbaşı’nın Bahçıvan Taso’nun bahçesinde ekili sebzeleri götürü olarak satın alıp daha sonra sattığı sebzelerden dolayı zararının ödenmesi talebiyle Taso’ya açtığı davada sulh olduğu Ma‘rûz Mevâdd-ı şer‘iye istimâ‘ı’çün kıbel-i şer‘-i şerîfden meb‘ûs Abdullah Efendi dâ‘îleri medîne-i Üsküdar’a tâbi‘ Kādı karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf ettikde karye-i mezbûrede sâkin Halil Bölükbaşı b. İbrahim nâm kimesne meclis-i ma‘kūd-ı mezkûrda Bağçevân Taso v. Hıristo nâm zimmî muvâcehesinde merkūm Taso zimmî târih-i i‘lâmdan sekiz ay mukaddem medîne-i mezbûre hâricinde Kalamış nâm mahâlde vâki‘ bağçesinde mezrû‘ olan bal kabağı ve sarımsak ve lahana ve pırasasını mücâzefeten bana dört yüz elli guruşa bey‘ ve teslîm ben dahi ba‘de’l-iştirâ âhara bey‘ eylediğimde ancak üç yüz yetmiş guruş hâsıl olup seksen guruş mutazarrır olmamla seksen guruşu taleb ve da‘vâ sadedinde olduğumda beynimize muslihûn tavassut edip merkūm Taso zimmî mâlından teberru‘an bana otuz guruş def‘ ü teslîm eyledikde ben dahi yedinden ahz ü kabz edip fîmâ-ba‘d ziyâde müdde‘âma ve bi’l-cümle husûs-ı mezkûra müte‘allika âmme-i de‘âvîden merkūm Taso zimmînin zimmetini ba‘de’l-ibrâ ve’l-kabûl kat‘-ı münâza‘a eyledikleri ba‘de’l-inhâ bi’l-iltimâs huzûr-ı âlîlerine i‘lâm olundu. Fî 22 min-Şevvâl sene 1204