Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 228 Hüküm no: 203 Orijinal metin no: [18b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hüseyin ile hanımı Zeliha’nın damatları Seyyid Bayram’da olan alacak davalarından vazgeçtikleri Ma‘rûz Medîne-i Üsküdar’da Solaksinan mahallesinde sâkin Mehmed b. Hüseyin tarafından ber-vech-i âtî vekîl olduğu es-Seyyid Ahmed b. Ali ve Osman b. Mustafa nâm kimesneler şehâdetleriyle sâbit olan İmâm Hafız Mustafa Efendi b. el-Hâc Mustafa nâm kimesne ile müvekkil-i mezbûrun zevcesi mu‘arrefetü’z-zât Zeliha bt. Osman nâm hatun medîne-i mezbûrede mahfil-i bâbda meclis-i şer‘-i hatîrde dâmâdları es-Seyyid Bayram b. Murtaza mahzarında mezbûr es-Seyyid Bayram bundan akdem müvekkil-i mezbûr Mehmed yedinden iktirâz ve kabz ve umûruna sarfla istihlâk eylediği yirmi guruş ve mezbûre Zeliha Hatun yedinden kezâlik iktirâz ve kabz eylediği on guruş ki cem‘an otuz guruşu bi’l-asâle ve bi’l-vekâle taleb ederiz deyü eyledikleri da‘vâlarından meccânen fâriğler olup meblağ-ı merkūma müte‘allika âmme-i de‘âvîden bi’l-asâle ve bi’l-vekâle mezbûr es-Seyyid Bayram’ın zimmetini ibrâ ve ıskāt eylediklerinde ol dahi ibrâmyeni [ibrâ’eyni]? kabûl edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 20 min-Şevvâl sene 1204