Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 392 Hüküm no: 400 Orijinal metin no: [92a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası Ahmed Çelebi b. Hamza’dan boşanan Afîfe bt. Mustafa’nın mehrini ve nafakasını tamamen aldığı Mahmiye-i İstanbul’da İshakpaşa Mahallesi sâkinelerinden olup zâtı İbrahim Çelebi b. Hasan ve Mehmed Beşe b. Hamza nâm kimesneler ta‘rîfleriyle mu‘arrefe olan Afîfe bt. Mustafa nâm hatun meclis-i şer‘-i hatîr-i lâzımü’t-tevkīrde zevc-i sâbıkı Ahmed Çelebi b. Hamza nâm kimesne mahzarında ikrâr ve takrîr-i kelâm edip mezbûr Ahmed Çelebi zevcim olup beynimizde hüsn-i mu‘âşeretimiz olmamağla târih-i kitâbdan bir gün mukaddem beni talâk-ı bâyin ile tatlîk edip lâkin zimmetinde mütekarrir ve ma‘kūdun-aleyh olan iki bin akçe mehr-i müeccelim ile nafaka-i iddet ve meûnet-i süknâm için bi’t-terâzî ta‘yîn olunan altı yüz akçe ki cem‘an iki bin altı yüz akçeyi edâ etmeyip zimmetinde kalmışidi hâlâ merkūm Ahmed Çelebi meblağ-ı mecmû‘-ı mezkûr iki bin altı yüz akçeyi işbu meclis-i şer‘de bana tamamen def‘ ve teslîm ben dahi yedinden ahz u kabz edip hukūk-ı zevciyyete müte‘allika âmme-i da‘vâdan merkūm Ahmed Çelebi’nin zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: İbrahim Çelebi b. Hasan, Mehmed Beşe b. Hamza, Ahmed Efendi b. el-Hâc Veli, Molla Salih b. Mehmed, Molla Osman b. İbrahim, Mehmed Çelebi b. Abdullah bölükbaşı, Sarrac Mustafa b. Mehmed muhzır.