Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 230 Hüküm no: 206 Orijinal metin no: [18b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha bt. Abdullah’ın, Hamamcı Rukiye’ye teslim ettiği bohçası içindeki mücevherinin tazmini talebiyle açtığı davayı ispat edemediği Ma‘rûz Medîne-i Üsküdar’da [Üsküdar’a] tâbi‘ Çenger karyesinde sâkine ve zâtı mu‘arrefe Hasna Zeliha bt. Abdullah nâm hatun medîne-i mezbûrede mahfil-i bâbda meclis-i şer‘-i hatîrde kezâlik zâtı mu‘arrefe sâhibe-i arzuhâl Hammâmî Rukiye bt. Mustafa nâm hatun mahzarında mezbûre Rukiye Hatun karye-i mezbûrede hamamcı olup târih-i i‘lâmdan otuz altı gün mukaddem mezbûrenin hamamına varıp lâbise olduğum libâsımı ve boğçamı hıfz için mezbûre Rukiye Hatun’a îdâ‘ ve teslîm etmiş iken hıfz etmeyip te‘addî eylediğine binâen boğça derûnunda mâlımdan beş yüz guruş kıymetli bir elmas çiçeğim zâyi‘ olmağla mezbûre Rukiye Hatun’dan tazmîn olunmak matlûbumdur deyü da‘vâ ve mezbûre Rukiye Hatun cevâbında müdde‘iye-i mezbûre zikr olunan libâs ve boğçasını kendiye îdâ‘ ve teslîmini inkâr etmeğin müdde‘iye-i mezbûre ber-vech-i muharrer müdde‘âsını isbâtdan ızhâr-ı acz ile istihlâf etmeğin mezbûre Rukiye Hatun gıbbe’t-tahlîfi’ş-şer‘î mûcebiyle müdde‘iye-i mezbûre Hasna Zeliha Hatun da‘vâ-yı mezkûresiyle mezbûre Rukiye Hatun’a bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 21 min-L sene 1204