Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 392 Hüküm no: 401 Orijinal metin no: [92b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sofya bt. Penço’nun kocası Ketko v. Yuvan’ın kendisini boşadığını şahitlerle ispat ettiği Mahmiye-i İstanbul’da Kumkapı kurbünde sâkine işbu sâhibetü’l-vesîka Sofya bt. Penço nâm Nasrâniye meclis-i şer‘-i şerîf-i enverde zevc-i sâbıkı Ketko v. Yuvan nâm zimmî muvâcehesinde üzerine da‘vâ ve takrîr-i kelâm edip mesfûr Ketko bundan akdem zevcim olup târih-i vesîkadan on ay mukaddem beni bâyinen tatlîk etmekle ben mesfûr Ketko’dan mübâne olmuş iken mezbûr Ketko bi-gayr-ı hakkın bana zevciyyet mu‘âmelesi murâd eder suâl olunup kas[r]-ı yedine tenbîh olunmak matlûbumdur dedikde gıbbe’s-suâl mesfûr Ketko cevâbında müdde‘iyye-i mesfûre zevcesi olduğunu ikrâr mâ‘adâyı inkâr edicek müdde‘iyye-i mesfûr[e]den müdde‘âsına mutâbık beyyine taleb olundukda beynlerinde adl olup Pizan Hanı’nda sâkin Mihal v. Tanaş ve Yuvan v. Kosit nâm zimmîler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mezkûr Tebko [Ketko] zimmî târih-i vesîkadan on ay mukaddem bizim huzûrumuzda zevce-i menkûhası işbu müdde‘iyye-i mesfûre Sofya’yı bâyinen tatlîk edip [etdi] bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eyledikde gıbbe ri‘âyetihî şerâiti’l-kabûl şehâdetleri makbûle olmağın mûcebince mesfûr Tebko [Ketko] bî-vech mu‘ârazadan men‘-birle mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Mustafa, Kādızâde İbrahim Çelebi, Abdullah Çelebi b. Mustafa.