Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 236 Hüküm no: 218 Orijinal metin no: [19b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamal Ali’den haksız yere para alan Abdurrahman Odabaşı’nın aldığı parayı iade etmesi Ma‘rûz Medîne-i Üsküdar’da İskele-i Kebîr kurbünde hamal tâifesinden Ali b. Süleyman medîne-i mezbûrede mahfil-i bâbda meclis-i şer‘-i hatîrde Abdurrahman Odabaşı b. Ahmed mahzarında mezbûr Abdurrahman bundan akdem medîne-i mezbûrede vâki‘ kolluk odabaşısı olup senin babanın hamal tâifesinden bir kimesneye otuz guruş deyni olup kable’l-edâ vefât etmekle deynini sen edâ eyle deyü beni bi-gayrı hakkın ahz ve habsedip fuzûlî on beş guruşumu ahz etmekle meblağ-ı mezbûru istirdâd ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını isbâta kādir olamayıp talebiyle mezbûr Abdurrahman Odabaşı’ya yemîn teklif olundukda ol dahi yemînden nükûl etmeğin mûcebiyle meblağ-ı merkūm on beş guruşu müdde‘î-i mezbûra edâ ve teslîme mezbûr Abdurrahman Odabaşı’ya şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 21 min-Şevvâl sene 1204