Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 236 Hüküm no: 219 Orijinal metin no: [19b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Efendi Vakfı’na ait Atpazarı’ndaki hanın yarısına mutasarrıf olan Mehmed b. Abdullah’ın biriken kiradan hissesine düşen parayı vakfa ödemesi Ma‘rûz Medîne-i Üsküdar’da Osman Efendi Vakfı’nın hâlâ mütevellîsi es-Seyyid Yakub Efendi b. Mahmud tarafından ber-vech-i âtî vekîl-i müseccel-i şer‘îsi ve vakf-ı mezbûrun câbîsi Mehmed Ali Efendi b. Salih medîne-i mezbûrede mahfil-i bâbda meclis-i şer‘-i hatîrde vakf-ı mezbûr musakkafâtından medîne-i mezbûrede Atpazarı’nda vâki‘ bir bâb hanın ber-mûceb-i temessük nısf-ı şâyi‘ine mutasarrıf olan Mehmed b. Abdullah mahzarında hân-ı mezkûr icâresinden nısf hisseye isâbet eden beher sene yirmi iki buçuk guruşdan bin iki yüz senesi Muharrem’i gurresinden bin iki yüz üç senesi Zilhicce’si gāyetine gelince üç senede müctemi‘ olan altmış yedi buçuk guruşu taraf-ı vakf için bi’l-vekâle hâlâ taleb ederim deyü da‘vâ ve mezbûr Mehmed cevâbında ber-vech-i muharrer ikrâr ü i‘tirâf etmeğin mûcebince meblağ-ı mezbûr altmış yedi buçuk guruşun edâsıyla mezbûr Mehmed ilzâm olunduğu bi’l-iltimâs huzûr-ı âlîlerine i‘lâm olundu. Fî 22 min-L sene 1204