Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 238 Hüküm no: 222 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manuk v. Karabet’in, kendisini şişlemek suretiyle yaralayan Arakil’e açtığı davada sulh olduğu Ma‘rûz Medîne-i Üsküdar’da Yenimahalle mütemekkinlerinden olup bundan akdem lede’l-keşf ve’l-mu‘âyene [mecrûh] idiği zâhir olan Manuk v. Karabet nâm zimmî medîne-i mezbûrede mahfil-i bâbda meclis-i şer‘-i hatîrde Arakil nâm zimmînin babası ve tarafından vech-i âtî üzere vekîl-i şer‘îsi olan İstefan v. Arakil nâm zimmî muvâcehesinde müvekkil-i merkūm Arakil zimmî târih-i i‘lâmdan on üç gün mukaddem mahalle-i mezbûre kurbünde Mezaristânbaşı nâm mahâlde bi-gayrı hakkın amden şiş ile sol koltuğum altından ve üstünden iki yerinden ve sol bileğim yanından bir yerinden ki cem‘an üç yerinden darb ve cerh etmekle mûcib-i şer‘îsini taleb ederim deyü eylediği da‘vâsından bâ-tavassut-ı muslihîn müvekkil-i merkūm Arakil zimmî ile yirmi iki buçuk guruş bedel-i makbûza sulh olup cerâhat-ı mezkûreye ve mâ yuhdesü minhe müte‘allika âmme-i de‘âvîden merkūm Arakil zimmînin zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî-gurrei Za sene 1204