Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 238 Hüküm no: 223 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Hüseyin ile validesi Zeliha’ya sürekli kötü sözler söyleyen Zenciye Hatice’nin bir daha kötü sözler söylememeyi taahhüt ettiği Ma‘rûz Medîne-i Üsküdar’da Selami mahallesinde sâkine ve zâtı mu‘arrefe sâhibe-i arzuhâl Havva bt. Hüseyin nâm hatun medîne-i mezbûrede mahfil-i bâbda meclis-i şer‘-i hatîrde derûn-ı arzuhâlde mezkûre Hadice bt. Abdullah nâm Zenciye tarafından sâbitü’l-vekâle vekîli zevci Zenci Selim b. Abdullah mahzarında mezbûre Hadice bundan akdem zevcim gāib ani’l-meclis el-Hâc Ahmed nâm kimesne için eşyâmı ahz eyledi deyü benden da‘vâ ve yed ve zimmetimde aslâ hakkı yoğiken bi-gayrı hakkın dâimâ menzilime gelip ta‘cîz ve bana ve hâzıratü bi’l-meclis vâlidem Zeliha bt. Mehmed’e itâle-i lisân edip emniyetimiz yokdur deyü teşekkî etmeğin vekîl-i mezbûr dahi zevcesi müvekkile-i mezbûre fîmâ-ba‘d mezbûretânın menzillerine varmayıp itâle-i lisân etmemek üzere ta‘ahhüd etmeğin bu vechile kat‘-ı münâza‘a eyledikleri mübâşiri Eyüb Çavuş kulları iltimâsıyla huzûr-ı âlîlerine i‘lâm olundu. Fî 24 min-L sene 1204