Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 393 Hüküm no: 402 Orijinal metin no: [92b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sivas’a tâbi Acıpınar mezraasının geliri konusunda Verese-i Simsar Vakfı ile Acıpınar köyü sipâhîsi Abdurrahman Sipahi’nin anlaştıkları Vilâyet-i Anadolu’da Sivas kazâsına tâbi‘ Ağva nezdinde Acıpınar nâm karyenin bâ-berât-ı âlîşân sipâhîsi olup mahmiye-i İstanbul’da müsâfiren sâkin Abdurrahman Sipâhî b. Hasan nâm kimesne meclis-i şer‘-i şerîf-i enverde yine Sivas’da vâki‘ Verese-i Simsar Vakfı’nın evlâdiyet ve meşrûtiyyet üzere mütevellîsi olan râfi‘u’l-kitâb es-Seyyid eş-Şeyh Mehmed Efendi b. Mehmed mahzarında takrîr-i kelâm ve tâ‘bir ani’l-merâm edip mezbûr eş-Şeyh es-Seyyid Mehmed Efendi’nin evlâdiyet ve meşrûtiyyet üzere mütevellîsi olduğu Verese-i Simsar Vakfı’nın Acıpınar mezra‘ası sipâhîsi olduğum Acıpınar karyesi arâzisiyle mahlût ve müşterek olmağla iki üç seneden berü nizâ‘dan hâlî olmadığından nâşî mezbûr es-Seyyid Mehmed Efendi ile murâfa‘a olunduğumda yedinde olan hüccet-i şer‘iyyelerinin mazmûnların muvâcehemizde ba‘de’l-isbât ve’l-hükm beynimize muslihûn tavassut edip ba‘de’l-yevm benim Acıpınar karyemin arâzisiyle Acıpınar mezra‘asının hâsıl olan a‘şâr-ı şer‘iyyesi cem‘ ve tahsîl olunup mecmû‘-ı mahsûlün rub‘unu vakf-ı mezbûr için merkūm eş-Şeyh es-Seyyid Mehmed Efendi kabz edip mâ‘adâ sülüs-i erba‘ını ben kabz etmek üzere beynimize tevkī‘ ve ıslâh ve bu vechile nizâ‘ımız kat‘ ve merkūm eş-Şeyh es-Seyyid Mehmed Efendi târih-i kitâba gelince beynimizde cereyân eden mu‘âmelâtdan benim zimmetimi ben dahi husûs-ı mezbûra müte‘allika da‘vâdan mezbûrun zimmetini ibrâ ve iskāt eylediğime binâen suâl olunup makālımız hüccet ve tarafeyne i‘tâ olunmak murâdımdır dedikde gıbbe’s-suâl mezbûr eş-Şeyh es-Seyyid Mehmed Efendi cevâbında fi’l-vâki‘ hâl mezbûr Abdurrahman Sipâhî’nin takrîr-i meşrûhu üzere olup kendinin ber-mûceb-i defter-i hâkānî vakfiyet üzere mutasarrıf olduğu Acıpınar mezra‘ası arâzisi sâlifü’l-beyân Acıpınar karye arâzisiyle mahlût [ve] müşâ‘ ve müşterek olmağın hîn-i murâfa‘ada yedinde olan müte‘addid hüce[c]-i şer‘iyyelerde mezbûr Abdurrahman Sipâhî muvâcehesinde mazmûnların ba‘de’l-isbât ve’l-hükm beynlerine muslihûn tavassut edip ba‘de’l-yevm hâsıl olan öşr-i mahsûlü cem‘ ve tahsîl olunup mecmû‘-ı mahsûlün rub‘unu vakf için kendisi kabz edip sülüs-i erba‘ını merkūm Abdurrahman Sipâhî kabz eylemek üzere beynimizde tevkī‘ ve ıslâh ve târih-i kitâba gelince cereyân eden ahz u i‘tâ da‘vâsından her birimiz âharın zimmetini ibrâ ve iskāt eyledik deyü kat‘ı nizâ‘ eylediklerin ol dahi mukır ve mu‘terif olmağla hıfzan li’l-makāl ketb olundu. Fi’l-yevmi’r-râbi‘ ve’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: es-Seyyid Osman Çelebi b. es-Seyyid Hasan, es-Seyyid Ali Çelebi b. es-Seyyid Hasan, es-Seyyid Hasan Ağa b. Mustafa, Şems Ahmed Efendi b. Ebûbekir, Mustafa Çelebi b. İbrahim, Ömer Çavuş b. Abdullah, Mehmed Çelebi b. Abdullah, İbrahim Efendi b. Mehmed Ağa.