Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 242 Hüküm no: 230 Orijinal metin no: [20b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Efendi’nin kardeşi oğlu Seyyid Abdurrahman’a emanet verdiği eşyalarının kendisine iade edilmesi; ancak alacak iddiasını ispat edemediği Ma‘rûz Medîne-i Üsküdar’da Debbâğlar mahallesinde sâkin es-Seyyid Mehmed Efendi b. es-Seyyid Hasan nâm kimesne medîne-i mezbûrede mahfil-i bâbda meclis-i şer‘-i hatîrde karındaşı oğlu es-Seyyid Abdurrahman b. Mustafa nâm kimesne mahzarında bundan akdem gāib ani’l-meclis Ali Efendi nâm kimesneye îsâl için mezbûr es-Seyyid Abdurrahman yedine teslîm eylediğim altmış guruşu mezbûr Ali Efendi’ye teslîm etmeyip zimmetinde kaldığından mâ‘adâ emlâkımdan iki aded çuka ve şalî binişlerimi fuzûlî ahz ve istihlâk etmekle kıymeti olan kırk guruş ki cem‘an yüz guruş ile yedimden isti‘âre ve kabz eylediği seksen yedi guruş kıymetli bir sîmli kılıç ve bir palaska ve bir gāşiyenin aynıları yedinde mevcûd olmağla taleb ederim deyü da‘vâ ve mezbûr es-Seyyid Abdurrahman cevâbında zikr olunan kılıç ve palaska ve gāşiyeyi ikrâr ve müdde‘î-i mezbûra edâsıyla ba‘de’l-ilzâm ziyâde müdde‘âsı olan meblağ-ı merkūm yüz guruşu inkâr etmeğin müdde‘î-i mezbûr müdde‘âsını isbâtdan ızhâr birle istihlâf etmeğin mezbûr es-Seyyid Abdurrahman ba‘de’t-tahlîfi’ş-şer‘î mûcebiyle müdde‘î-i mezbûr es-Seyyid Mehmed Efendi da‘vâ-yı mezkûresiyle mezbûr es-Seyyid Abdurrahman’a bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 22 min-L sene 1204