Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 242 Hüküm no: 231 Orijinal metin no: [20b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Süleyman b. Mehmed’in, Osman ve Mustafa’nın satın aldıkları araziler aleyhine açtığı şuf’a davasında haksız bulunduğu Ma‘rûz Medîne-i Üsküdar’a muzâfe Taşköprü nâhiyesine tâbi‘ Tepemenayir(?) karyesinde sâkin Bostanî Süleyman b. Mehmed nâm kimesne medîne-i mezbûrede mahfil-i bâbda meclis-i şer‘-i hatîrde Osman b. Mustafa ve Mustafa b. Ömer nâm kimesneler mahzarlarında karye-i mezbûrede vâki‘ lede’l-ahâli ve’l-cîrân ma‘lûmü’l-hudûd bir kıt‘a mülk bostanım ittisâlinde gāibât ani’l-meclis Âlime ve Zeyneb ve Ümmügülsüm nâm hatunların yedlerinde şâyi‘an ve iştirâken mülk bostan ve mer‘a ve harman yerleri olmağla mezbûretân Âlime ve Zeyneb hisse-i şâyi‘alarını işbu mezbûr Osman’a beşer guruşdan on guruşa bey‘-i kat‘î ile bey‘ ve teslîm ve kabz-ı semen eyledikleri mesmû‘um olduğu anda bilâ-tehîr taleb-i şuf‘a ve müvâsebe ile işhâd etmiş idim hâlâ mezbûr Osman semen nâmıyla medfû‘u olan meblağ-ı merkūm on guruşu yedimden ahz ve emlâk-i mezkûreyi bana teslîme tenbîh olunması ile yine karye-i mezbûre hâricinde Kaftancızâde tımarı toprağında vâki‘ kezâlik arâzi-i mîriyeden benim tarlam ittisâlinde mezbûrât Âlime ve Zeyneb ve Ümmügülsüm’ün müşterek tarlaları olmağla bedel-i ma‘lûm mukābelesinde mezbûr Osman ile mezbûr Mustafa’nın babası mezbûr Ömer’e ferâğ ve tefvîz ba‘dehû mezbûr Ömer vefât edip hissesi oğlu mezbûr Mustafa ile âhar oğlu diğer Osman’a tapu ile intikāl ve hâlâ mutasarrıf olmalarıyla emlâk-i mezkûre ile tarla-yı merkūmelere şefî‘ olduğum ecilden bi-tarîki’ş-şuf‘a taleb ederim deyü da‘vâ ve mezbûr Osman cevâbında mezbûretân Âlime ve Zeyneb emlâk-i mezkûrede olan hisselerini beşer guruşdan on guruş ile mechûlü’l-aded birer kabza fülûs-ı mudî‘a ıskāt-ı şuf‘a ile bana bey‘ ve temlik ben dahi iştirâ etmiş idim deyü bin iki yüz üç senesi Şa‘bâni’l-mu‘azzam’ın sekizinci günü târihiyle müverrah ve nâhiye-i mezbûre nâibi Mehmed Efendi imzâsıyla mümzât ve hâtemiyle mahtûme bir kıt‘a mübâya‘a hücceti ibrâzıyla ba‘de’d-def‘ ve’l-inkâr mezbûr Osman def‘-i mezkûrunu ve mazmûn-ı hüccet-i mezkûreyi udûlden Hasan b. İbrahim ve Mustafa b. Mehmed nâm kimesneler şehâdetleriyle vech-i şer‘î üzere muvâcehesinde ba‘de’l-isbât müdde‘î-i mezbûrun takrîri üzere sâlifü’z-zikr arâzi-i mîriyede şuf‘a da‘vâsı meşrû‘a olmamağla müdde‘î-i mezbûr Bostanî Süleyman zikr olunan emlâk ve tarlalarda da‘vâ-yı şuf‘a ile mezbûrân Osman ve Mustafa’ya bî-vech mu‘ârazadan men‘ olundukları bi’l-iltimâs huzûr-ı âlîlerine i‘lâm olundu. Fî 18 min-L sene 1204