Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 244 Hüküm no: 233 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinanpaşa mahallesi ahalisinden uygunsuz hareketleri dolayısıyla Mehmed b. İbrahim ile hanımının ihraç edilmeleri Ma‘rûz Medîne-i Üsküdar’da Sinanpaşa mahallesi imâmı Cafer Efendi b. Mustafa ve ahâlisinden Hafız Hüseyin Efendi b. Ahmed ve Mustafa Ağa b. Abdullah ve Ahmed Ağa b. Mustafa ve el-Hâc Ahmed Ağa b. Mehmed ve Şakir Beyefendi b. Mehmed ve el-Hâc Ali b. Osman ve İbrahim Efendi b. el-Hâc Ebûbekir ve Ahmed Ağa b. Mustafa ve Mehmed Saidullah Ağa b. Süleyman ve Hüseyin Ağa b. Mehmed ve İbrahim Ağa b. Salih ve Ahmed Ağa b. Mustafa nâm kimesneler medîne-i mezbûrede mahfil-i bâbda meclis-i şer‘-i hatîrde Mehmed b. İbrahim nâm kimesne ile zevcesi mu‘arrefetü’z-zât Nefise bt. Mehmed mahzarlarında mezbûrân Mehmed ve Nefise mahalle-i mezbûrede müsteciren sâkinler olup lâkin kendi hâllerinde olmayıp bî-edeb olmağla dâimâ mûcib-i ta‘zîr olur elfâz-ı kabîha ile herbirimize şetm ve ırzımızı hetk eylediklerinden mâ‘adâ mezbûre Nefise nâ-mahremden ictinâb etmeyip ba‘zı feseka makūlesinden mechûlü’l-ahvâl kimesneleri menziline ahz etmekle bi’d-defa‘ât kendiye nush ü pend eylediğimizde mü[te]nassıhlar olmayıp ef‘âl-i kabîhasında ısrâr ve bizi ta‘cîz ve tekdîrden hâlî olmayıp kendilerden bi’l-külliye emniyetimiz meslûb ve hattâ târih-i i‘lâm gecesi işbu hâzıratü bi’l-meclis ecnebîden Emine bt. Abdullah ve Hafize bt. Mehmed ve Edâî bt. Abdullah nâm avratlar ile el-Hâc Mustafa b. Ahmed ve Selim b. Abdullah nâm kimesneler zevcân-ı mezbûrânın menzillerinde icrâ-yı fısk için sekrân oldukları hâlde ahz olmuşdur deyü sû’-i hâllerini muvâcehelerinde ihbâr ve fîmâ-ba‘d zevcân-ı mezbûrân menzil-i mezkûrda ikāmet etmeyip mahalle-i mezbûreden ihrâc olunmak bâbında fermân-ı âlîleri sudûrunu ahâli-i mezbûreden herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî-gurrei Za sene 1204