Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 244 Hüküm no: 234 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah bt. Mehmed’in, kalan parasının verilmesi için açtığı davada sulh olduğu Ma‘rûz Medîne-i Üsküdar’da Selami mahallesinde sâkine mu‘arrefetü’z-zât Emetullah bt. Mehmed medîne-i mezbûrede mahfil-i bâbda meclis-i şer‘-i hatîrde kezâlik zâtı mu‘arrefe Emine bt. Ali nâm hatun muvâcehesinde mezbûre Emine Hatun târih-i i‘lâmdan yedi sene mukaddem yedimden iktirâz ve kabz ve umûruna sarfla istihlâk eylediği yüz guruş hakkımın elli iki guruşunu bi’d-defa‘ât yedinden ahz ve kırk sekiz guruşu zimmetinde bâkī kalmağla taleb ederim deyü eylediği da‘vâsından bâ-tavassut-ı muslihîn yirmi guruş bedel mukābelesinde mezbûre Emine Hatun ile sulh olup ziyâde müdde‘âsı olan yirmi sekiz guruşa müte‘allika âmme-i de‘âvîden mezbûre Emine Hatun’un zimmetini ibrâ ve ıskāt eyledikde ol dahi ibrâsını kabûl edip lâkin bedel-i sulh olan meblağ-ı merkūm yirmi guruşu hâlen edâya kudreti olmayıp tecîle tâlibe olmağla müdde‘iye-i mezbûre dahi târih-i i‘lâmdan otuz bir gün tamamında edâ etmek üzere bi’t-taleb mezbûre Emine’yi bi’r-rızâ tecîl eyledikde ol dahi ecel-i merkūm hulûlünde edâya ta‘ahhüd ve işbu hâzır bi’l-meclis zevci Abdi Usta b. İbrahim nâm kimesne dahi meblağ-ı müeccel-i mezkûr yirmi guruşa tarafeynden bi’l-emr ve’l-kabûl [kefîl] ve dâmin olup bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 14 min-L sene 1204