Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 245 Hüküm no: 235 Orijinal metin no: [21a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’ın Davudpaşa mahallesi ahalisinin, kendilerine sürekli olarak küfreden İsmail b. Mustafa’nın mahalleden ihraç edilmesi talepleri Ma‘rûz Medîne-i Üsküdar’da Davudpaşa mahallesi imâmı Süleyman Efendi b. Mehmed ve ahâlisinden Osman Ağa b. Mehmed ve Hafız Ali b. Süleyman ve Bekir Beşe b. Mehmed ve Emin Ağa b. İbrahim ve el-Hâc İbrahim b. Davud ve el-Hâc Süleyman b. Halil ve el-Hâc Veli b. Mahmud ve Ali Beşe b. Veli ve Osman [b.] Yusuf ve Abdullah b. Mehmed ve Mehmed Odabaşı b. Ali ve Hasan b. Mustafa ve diğer Hasan b. Osman nâm kimesneler medîne-i mezbûrede mahfil-i bâbda meclis-i şer‘-i hatîrde yine mahalle-i mezbûrede sâkin İsmail b. Mustafa mahzarında mezbûr İsmail kendi hâlinde ırzıyla mukayyed olmayıp müzevvir ve müfsid olup mahalle-i mezbûre ahâlisi ile gavga ve herbirini bir gûne ta‘cîz ve tekdîrden hâlî olmayıp cümlemize şütûm-ı galîza ile şetm ve ırzımızı hetk etmekle bi’d-defa‘ât kendiye nush ve pend eylediğimizde mütenassıh olmayıp ef‘âl-i sâbıkāsında ısrâr ve mezbûr İsmail’den bu vechile emn ü rahatımız bi’l-külliye meslûb olmuşdur deyü sû’-i hâlini muvâcehesinde ihbâr ve mezbûr İsmail mahalle-i mezbûreden ihrâc olunmak bâbında fermân-ı âlîleri sudûrunu herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 23 min-Şevvâl sene 1204