Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 394 Hüküm no: 403 Orijinal metin no: [93a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Armiya b. Haçok’un Uncu el-Hâc İsmail b. Mehmed’e borcu olduğunu kabul ettiği Mahrûse-i Galata muzâfâtından İstinye nâhiyesine tâbi‘ Sarıyer nâm karyede habbâz olan Armiya v. Haçok nâm zimmî meclis-i şer‘-i şerîf-i enverde mahrûse-i mezbûre muzâfâtından Fındıklı kasabasında Perizâthatun Mahallesi ahâlîsinden râfi‘u’l-kitâb Uncu el-Hâc İsmail b. Mehmed nâm kimesne mahzarında ikrâr-ı tâm ve takrîr-i kelâm edip mezbûr el-Hâc İsmail’den bundan akdem iştirâ ve kabz eylediğim beynimizde vezn ve keyli ilm-i şer‘î ile ma‘lûm dakīk bahâsından hâlâ seksen dokuz bin dört yüz elli akçe zimmetimde mezbûr el-Hâc İsmail’e vâcibü’l-edâ ve lâzımü’l-kazâ deynimdir dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Fahrü’l-kuzât Musazâde Abdullah Efendi, el-Hâc Mehmed b. Hüseyin, İbrahim b. Mehmed, el-Hâc Ahmed b. Mustafa, Çukadâr el-Hâc Mehmed b. Ahmed, Abdullah Çelebi b. Mehmed, Salih Çelebi b. Süleyman el-muhzır.