Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 246 Hüküm no: 237 Orijinal metin no: [21a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalband Mehmed’in Canbaz İbrahim’den satın alıp ayıplı olduğundan iade ettiği beygir bedeli davasını ispat edemediği Ma‘rûz Medîne-i Üsküdar’da Meyyitkapısı kurbünde Na‘lband Mehmed b. Abdullah nâm kimesne medîne-i mezbûrede mahfil-i bâbda meclis-i şer‘-i hatîrde Canbaz İbrahim b. Abdullah mahzarında mezbûr İbrahim târih-i i‘lâmdan beş buçuk sene mukaddem emlâkımdan bir re’s doru bârgirini cemî‘ uyû[bu]ndan sâlim olmak üzere kırk altı guruş semen-i medfû‘ ve makbûza bana bey‘ ben dahi ba‘de’l-iştirâ zikr olunan bârgirin ayb-ı kadîmi zuhûr ve bi’t-terâzî bârgir-i mezkûru redd ü teslîm ol dahi ahz ü kabzı olan meblağ-ı merkūmun otuz guruşunu bana def‘ ü teslîm ve on altı guruşu zimmetinde bâkī kalmağla taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını isbâta kādir olamayıp talebiyle mezbûr İbrahim gıbbe’t-tahlîfi’ş-şer‘î mûcebiyle müdde‘î-i mezbûr husûs-ı mezkûrda mezbûr İbrahim[e] bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 11 min-Za sene 1204