Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 395 Hüküm no: 404 Orijinal metin no: [93a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Koltukçu Osman’ın sağlığında Mustafa Çelebi’ye emaneten verdiği eşyaların eşi Fâtıma bt. Abdullah tarafından teslim alındığı Mahmiye-i İstanbul’da Kumkapı dâhilinde Nişancıpaşa Mahallesi’nde sâkin iken bundan akdem maktûlen vefât eden Koltukçu Osman b. Hasan b. Abdullah’ın verâseti zevce-i menkûha-i metrûkesi Fâtıma bt. Abdullah nâm hatun ile sulbiye sagīre kızı Ümmügülsüm nâm sagīreye münhasıra olduğu şer‘an sâbit ve müte‘ayyin oldukdan sonra mezbûre Fâtıma Hatun zâtı ta‘rîfi’ş-şer‘î asâleten ve sagīre kızı mezbûre Ümmügülsüm’ün tesviye-i umûruna kıbel-i şer‘den mansûbe vasîsi olmağla vesâyeten meclis-i şer‘-i şerîf-i enverde işbu bâ‘isü’l-kitâb Mustafa Çelebi b. Mehmed nâm kimesne mahzarında ikrâr ve takrîr-i kelâm edip zevcim müteveffâ-i mezbûr hayâtında eşyâ-i memlûkesinden bir tabanca ve bir Şam alacası anteri ve bir iplik alacası köhne anteri ve bir köhne kürk ve bir köhne kürk kabı ve bir köhne çukaya kaplı teyin kürk ve köhne çuka kürk kabı ve bir bağır yeleği ve bir çuka çakşır ve bir yeşil çuka biniş ve bir köhne kuzu kürkü ve iki iplik alacası ve çintiyân ve bir mâî çukaya kaplı kürk ve bir mâî çuka şalvar ve bir meneviş çuka zen cebesi ve bir döşek çarşafını mezbûr Mustafa Çelebi’ye bi-tarîkı’l-emâne vaz‘ ve teslîm etmekle zikrolunan eşyâ-i muharrere-i mezbûreyi mezbûr Mustafa bana tamamen def‘ ve teslîm eylediğinde ben dahi bi’l-asâle ve bi’l-vesâye ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Abdullah, Kādızâde İbrahim b. Mustafa, Duhânî Mehmed Çelebi b. Ahmed.