Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 251 Hüküm no: 249 Orijinal metin no: [22a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bütün esnaf kethuda ve yiğitbaşılarının eksik ayarlı altın çeşitlerini kullanmamak ve yanında bu tür altın para bulunduranların Darphane-i amire’ye satmak üzere söz verip birbirilerine kefil oldukları Ma‘rûz Sâdır olan fermân-ı âlîlerine imtisâlen medîne-i Üsküdar’da bi’l-cümle esnâf kethudâları ve yiğitbaşıları meclis-i şer‘a ihzâr ve mazmûn-ı emr-i âlî üzere Der-aliyye ve muzâfâtından hiçbir mahâlde nâkısu’l-vezn ecnâs altın râyic ve mütedâvil olmayıp Darbhâne-i âmire’de hesâb olunduğu vech üzere Yaldız altının beher çekirdeği otuz beş ve Macar altının otuz dört ve İstanbul fındık altının otuz üç ve Mısır fındık altının otuz iki buçuk ve İstanbul zer-i mahbûbunun otuz ve Mısır zer-i mahbûbunun yirmi altı ve zincirli altının otuz dokuz akçeye olduğu âşikâr olmağla fîmâ-ba‘d nâkısu’l-vezn altını fiyât-ı mezkûre üzere Darbhâne-i âmire tarafından şirâya memûr olanlara bey‘ ve Darbhâne-i âmire’ye irsâle esnâf kethudâlarına ve yiğitbaşılarına başka başka tenbîh olundukda onlar dahi ber-mantûk-ı emr-i âlî amel ve harekete ta‘ahhüd ve hilâf-ı ta‘ahhüd hareket etmemek üzere birbirilerine tekeffül ve kefâletleri tescîl olunmağla sûret-i nizâmları imtisâlen li’l-emri’l-âlî huzûr-ı âlîlerine i‘lâm olundu. Fî 3 min-Za sene 1204