Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 252 Hüküm no: 251 Orijinal metin no: [22a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mirahor-ı Evvel Ali Ağa Vakfı’na borcu olan Şalîoğlu Osman b. Hüseyin’in borcunu ödemesi Ma‘rûz Medîne-i Üsküdar’da vâki‘ merhûm ve mağfûrun-leh Hüdâî eş-Şeyh es-Seyyid Mahmud Efendi Vakfı mülhakātından Mirâhor-ı evvel Ali Ağa Vakfı’nın kāimmakām-ı mütevellîsi Hafız Ali Efendi b. el-Hâc Mustafa medîne-i mezbûrede mahfil-i bâbda meclis-i şer‘-i hatîrde Şarlıoğlu Osman b. Hüseyin nâm kimesne mahzarında işbu yedimde olan bir kıt‘a temessük nâtık olduğu üzere târih-i i‘lâm senesi Recebi’l-ferd’i gurresinden mâl-ı vakf-ı mezbûrdan yedimden iktirâz ve kabz ve kendi umûruna sarfla istihlâk eylediği dört yüz on dört guruş ve meblağ-ı merkūm nemâsından bâ-devr-i şer‘î ilzâm ve iltizâm olunan yirmi iki buçuk guruşun on guruşunu yedinden ahz bâkī on iki buçuk guruş ki cem‘an dört yüz yirmi altı buçuk guruşu taraf-ı vakf için mezbûr Osman’dan bi’t-tevliye taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı mecmû‘-ı merkūm dört yüz yirmi altı buçuk guruşu mütevellî-i mezbûra edâsıyla mezbûr Osman şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 2 min-Za sene 1204