Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 253 Hüküm no: 252 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Hüdai Vakfı’na ait evde kiracı olan Fatma bt. Ahmed’in birikmiş kiralarını vakfa ödemesi Ma‘rûz Medîne-i Üsküdar’da vâki‘ merhûm Hüdâî es-Seyyid eş-Şeyh Mahmud Efendi hazretlerinin evlâd-ı vakfının kāimmakām-ı mütevellîsi Ali Efendi b. el-Hâc Mustafa tarafından vekîl-i müseccel-i şer‘îsi ve vakf-ı mezkûrun câbîsi es-Seyyid Emrullah Efendi b. Veli medîne-i mezbûrede mahfil-i bâbda meclis-i şer‘-i hatîrde medîne-i mezbûrede Gülfamhatun mahallesinde kâin vakf-ı mezbûr musakkafâtından olup yevmî bir akçe icâre-i müeccele ile ber-mantûk-ı temessük bir bâb menzile mutasarrıfe olan Şerife Fatıma bt. Ahmed nâm hatun mahzarında mezbûre Şerife Fatıma Hatun’un tasarrufunda olan menzil icâresinden bin iki yüz bir senesi Muharrem’i gurresinden iki yüz üç senesi Zilhicce’si gāyetine gelince üç senede mezbûrenin zimmetinde müctemi‘a olan dokuz guruş icâreyi taraf-ı vakf için bi’l-vekâle taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı merkūm dokuz guruşun edâsıyla mezbûre Şerife Fatıma Hatun şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 10 min-L sene 1204