Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 253 Hüküm no: 253 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuzguncuk ahalisinin, kendilerini rahatsız eden Yahudi Sabatay v. Behor’un köyden ihraç edilmesini talep ettikleri Ma‘rûz Mevâdd-ı şer‘iye istimâ‘ı’çün kıbel-i şer‘-i şerîfden meb‘ûs Abdullah Efendi dâ‘îleri medîne-i Üsküdar’a tâbi‘ Kuzguncuk karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf ettikde karye-i mezbûre mütemekkinlerinden Haim v. İlya ve Mosi v. İsak ve diğer Mosi v. Davit ve Yuda v. Avram ve İsrail v. İsak ve Menahem v. İsak ve Mayer v. Yuda ve Simyon v. Avram ve Yuda v. Mosi ve İsak v. Avram ve Roben v. Menahem ve Haim v. Şapaya ve Oseb v. Yuda nâm Yahûdîler ile Mihal v. Dimitri ve Petro v. Dimitri ve Alesan v. Kostanti ve Yanaki v. Tanaş ve Nikola v. Foti nâm zimmîler meclis-i ma‘kūd-ı mezkûrda Sabatay v. Behor nâm Yahûdî muvâcehesinde merkūm Sabatay kendi hâlinde olmayıp gecelerde geşt ü güzâr ve ba‘zı menzillere duhûl ve dâimâ bizlere şütûm-ı galîza ile şetm ve ırzımızı hetk edip bi’d-defa‘ât kendiye nush ü pend olundukda kat‘a ısgā etmeyip âdet-i müstemirresinde ısrâr etmekle mersûm Sabatay’ın sû’-i hâl üzere olduğundan bi’l-külliye emn ü rahatımız meslûb olmuşdur deyü mersûmun sû-i hâlini muvâcehesinde herbirileri teşekkî ve karye-i mezbûreden ihrâc olunmak bâbında fermân-ı âlîleri sudûrunu herbiri istid‘â ve istirhâm eyledikleri ba‘de’l-inhâ bi’l-iltimâs huzûr-ı âlîlerine i‘lâm olundu. Fî 20 Za sene 1204