Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 254 Hüküm no: 254 Orijinal metin no: [22b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurddoğmuş ahalisinin, köylerinde eşkıyalık yapıp ahaliyi taciz ve tehdit eden Kürt Hasan’ın cezalandırılmasını talep ettikleri Ma‘rûz Medîne-i Üsküdar’a muzâfe Yoros nâhiyesine tâbi‘ Kurddoğmuş karyesi ahâlisinden el-Hâc Mustafa Ağa b. Hasan ve Ahmed b. Abdi ve es-Seyyid Ömer b. İsmail ve Hüseyin b. İbrahim ve Mehmed Ağa b. Hüseyin ve Ahmed b. Hüseyin ve Hüseyin b. Feyzullah ve Salih b. Halil ve Ömer b. Mehmed ve Hüseyin b. Ahmed ve Ömer b. Mustafa ve Salih b. Hüseyin ve Mehmed b. Ömer ve Mehmed Ali b. İbrahim ve Mahmud b. Salih ve Feyzullah b. Veli ve Ahmed b. Mehmed ve Veli b. İbrahim ve Memiş b. Hasan ve Mahmud b. Ömer ve Ömer b. Ali ve Hasan b. Mehmed ve Ali b. Ömer nâm kimesneler medîne-i mezbûrede mahfil-i bâbda meclis-i şer‘-i hatîrde koru-yı hümâyûn zâbiti ma‘rifetiyle ahz ve meclis-i şer‘a ihzâr olunan Kürd Hasan b. Ali muvâcehesinde mezbûr Hasan kendi hâlinde ırzıyla mukayyed olmayıp eşkıyâ zümresinden olmağla dâimâ müsellah karye-i mezbûre ve civârında geşt ü güzâr ve herbirimizin mâl ve ırzlarına ta‘arruz kasdıyla cümlemize şütûm-ı galîza ile şetm ve ırzımızı hetk edip ba‘zılarımızı tüfenk kurşunu ile darb eylediğinden mâ‘adâ karye-i mezbûreyi dahi ihrâk bi’n-nâr ederim deyü cümlemizi ihâfe edip mezbûr Hasan’ın bu misillü harekât-ı şenî‘a âdet-i müstemirresi olup mezbûr Hasan’a bi’d-defa‘ât nush ü pend eylediğimizde mütenassıh olmayıp ef‘âl-i kabîhasında ısrâr ve mezbûr Hasan’dan emniyetimiz meslûb olmuşdur deyü mezbûr Hasan’ın sû’-i hâlini herbiri ihbâr ve mezbûr Hasan’ın hakkında iktizâ eylediği ta‘zîr ve tedîbi re’y-i âlîlerine menût olunduğu ma‘lûm-ı devletleri buyuruldukda bâkī emr ü fermân hazret-i veliyyü’l-emrindir. Fî 24 min-Za sene 1204