Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 395 Hüküm no: 405 Orijinal metin no: [93a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehiden vefât eden Mustafa Ağa’nın sağlığında kölesi Mehmed’i azat ettiği Rıkk-ı sâbıkını mu‘terif olmağla zikri âtî da‘vâya kıbel-i şer‘den me’zûn olan uzun boylu, kara kaşlı, elâ gözlü Acemiyyü’l-asl Müslimü’l-mille râfi‘u’l-vesîka Mehmed b. Abdülmennan nâm şâbb-ı emred meclis-i şer‘-i şerîf-i enverde vilâyet-i Anadolu’da Şarkipare kazâsı ahâlîsinden olup şark tarafında vâki‘ sefer-i hümâyûnda şehîden vefât eden Mustafa Ağa b. İbrahim b. Abdullah’ın zevcesi Âişe Hatun bt. Ahmed b. Abdullah ile sulbî kebîr oğulları Mehmed ve Ahmed ve Salih ve Ebûbekir ve Halil taraflarından tereke-i müteveffâ-i merkūmu vâzı‘u’l-yed olanlardan taleb ve da‘vâ ve ahz u kabza ve kendilere îsâle ve kabz ve îsâl mütevakkıf olduğu umûrun küllîsine taraflarından vekîl olduğu bundan akdem muvâcehe-i hasm-ı şer‘îde Mehmed b. Veli ve Osman b. Sinan nâm kimesneler şehâdetleriyle şer‘an sâbit olan ammileri Ömer Ağa b. İbrahim mahzarında üzerine da‘vâ ve ve takrîr-i kelâm edip müteveffâ-i mezbûr Mustafa Ağa hayâtında yedinde abd-i memlûkü olduğum hâlde beni mâlından i‘tâk ve kayd-ı rıkdan ıtlâk etmişiken mezbûr Ömer Ağa verese-i müteveffâ-i mezbûr taraflarından bi’l-vekâle bana rık olmak üzere vâzı‘u’l-yed eder suâl olunup kasr-ı yedine tenbîh ve sebîlim tahliyye olunmak murâdımdır dedikde gıbbe’s-suâl mezbûr Ömer Ağa cevâbında fi’l-vâki‘ mevsûf-i mezbûr Mehmed müteveffâ-i mezbûr Mustafa Ağa’nın abd-i memlûkü olmak üzere bi’l-vekâle vaz‘-ı yedini ikrâr vech-i muharrer üzere ıtkı ma‘lûmum değildir deyü inkâr edicek mevsûf-i mezbûr Mehmed’den da‘vâ-yı meşrûhunu mübeyyine beyyine taleb olundukda udûl-i ahrâr-ı ricâl-i Müslimînden olup Hazret-i Ebî Eyyüb Ensârî -radiye anhu Rabbihi’l-Bârî- mahallâtından Süleymansubaşı Mahallesi ahâlîsinden Ali Beşe b. Ebûbekir ve Hasan Beşe b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-i mezbûr Mustafa Ağa b. İbrahim b. Abdullah hâl-i hayâtında mevsûf-i mezbûr yedinde abd-i memlûkü olduğu hâlde mevsûf-i mezbûr Mehmed’i bizim huzûrumuzda mâlından i‘tâk ve kayd-ı rıkdan ıtlâk ve husûs-ı mezbûra bizi işhâd eyledi biz bu husûsa bu vech üzere şâhidleriz ve şehâdet dahi ederiz deyü her biri edâ-yı şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mevsûf-i mezbûr Mehmed’den kasr-ı yedine vekîl-i mezbûr Ömer Ağa’ya tenbîh-birle mevsûf-i mezbûrun sebîli tahliyye olunup mâ-vaka‘a bi’t-taleb ketb olundu. Fi’l-yevmi’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Abdullah Efendi Musazâde, Ahmed Beşe b. Ömer, Abdurrahman Odabaşı b. ( ), el-Hâc Ebûbekir b. Süleyman 67 b[ölük], Salih Çelebi b. Süleyman el-muhzır, Abdullah Çelebi b. Mehmed.