Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 255 Hüküm no: 256 Orijinal metin no: [22b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurddoğmuş köyünden, yaralanarak ölen Abdurrahman b. Mehmed’in muayenesinin yapılarak defnine izin verildiği Ma‘rûz Bi’l-iltimâs kıbel-i şer‘î şerîfden meb‘ûs Ali Efendi dâ‘îleri ve koru-yı hümâyûn zâbiti ve sâir mazbûtü’l-esâmî Müslimîn ile medîne-i Üsküdar’a tâbi‘ Kurddoğmuş karyesinde tüfenk saçmasıyla mecrûhan fevt olan Abdurrahman b. Mehmed’in sâkin olduğu menzile varıp akd-i meclis-i şer‘-i nebevî ettikde müteveffâ-yı mezbûrun ceddi el-Hâc Mustafa ile vâlidesi Elveda nâm hatun meclis-i ma‘kūd-ı mezkûrda oğlumuz müteveffâ-yı mezbûr refîki işbu hâzır bi’l-meclis Mehmed b. Hüseyin nâm kimesne ile târih-i i‘lâmdan bir gün mukaddem vakt-i asrda karye-i mezbûre civârında vâki‘ İkitepelik nâm mahâlden gelirken bi-kazâillâhi te‘âlâ mezbûr Mehmed’in tüfengi boşanıp saçması oğlumuz müteveffâ-yı mezbûrun sol memesi üstüne isâbet ve cerh edip ol anda müte’essiren fevt olmağla kıbel-i şer‘den keşf ve mu‘âyene olunmak matlûbumuzdur dediklerinde müteveffâ-yı mezbûrun a‘zâsına nazar eylediklerinde fi’l-hakīka mezbûr Abdurrahman sol memesi üzerinden tüfenk saçması yarasıyla mecrûhan vefât eylediğini ba‘de’l-keşf ve’l-mu‘âyene defnine izin birle vâki‘ hâli mezbûr dâ‘îleri mahâllinde ba‘de’t-tahrîr ve’l-inhâ bi’l-iltimâs huzûr-ı âlîlerine i‘lâm olundu. Fî 2 min-C sene 1204