Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 256 Hüküm no: 259 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mustafa’yı taş ile kafasından yaralayan Enfiyeci İsak’a açılan davada her iki tarafın sulh olduğu Ma‘rûz Medîne-i Üsküdar’da Süleymanağa mahallesinde sâkin ber-vech-i âtî başının sol yanından taş yarasıyla muvâzzahaten meşcûc idiği lede’l-keşf ve’l-mu‘âyene zâhir olan es-Seyyid Mustafa b. Mehmed nâm sagīrin vâlidesi ve velîsi mu‘arrefetü’z-zât Havva bt. Hüseyin nâm hatun medîne-i mezbûrede mahfil-i bâbda meclis-i şer‘-i hatîrde Enfiyeci İsak nâm Yahûdî tarafından ber-vech-i âtî tasdîka vekîl olan babası Yaşova v. İsak nâm Yahûdî muvâcehesinde müvekkil-i merkūm İsak Yahûdî târih-i i‘lâmdan bir gün mukaddem medîne-i mezbûrede Sebilkarşısı nâm mahâlde vakt-i mağribde oğlum mezbûrun başının sol yanına taş ile bi-gayrı hakkın amden darb ve muvâzzahaten şecc etmekle mûcib-i şer‘îsini taleb ederim deyü da‘vâ sadedinde olmuş idim el-hâletü hâzihî ben da‘vâ-yı mezkûremi isbâta kādire olamayıp müvekkil-i merkūm İsak Yahûdî dahi yemîn edeceği muhakkak ve sulh sagīr-i mezbûr hakkında enfa‘ olmağla beynimize muslihûn tavassut edip beni da‘vâ-yı mezkûremden on beş guruş bedel-i makbûz mukābelesinde merkūm Yaşova Yahûdî ile sulh eylediklerinde ben dahi nef‘an li’s-sagīr bi’l-velâye sulh-ı mezkûru kabûl ve fîmâ-ba‘d oğlum sagīr-i mezbûrun darb ve şeccine müte‘allıka merkūm İsak Yahûdî ile kat‘a da‘vâ ve husûmetim kalmadı dediğini vekîl-i merkūm tasdîk ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 24 min-Za sene 1204