Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 257 Hüküm no: 260 Orijinal metin no: [23a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdullah’dan borç alan (vefa) Hanım bt. Artin’in kalan borcunu ödemesi Ma‘rûz Medîne-i Üsküdar’da Kefçe mahallesinde sâkin es-Seyyid Abdullah b. el-Hâc Mehmed medîne-i mezbûrede mahfil-i bâbda meclis-i şer‘-i hatîrde şahsı mu‘arrefe Hanım bt. Artin nâm Nasrâniye muvâcehesinde merkūme Hanım Nasrâniye târih-i i‘lâmdan yirmi iki ay mukaddem yedimden ve mâlımdan istikrâz ve kabz ve umûruna sarfla istihlâk eylediği iki yüz guruş deyni mukābelesinde zevci gāib ani’l-meclis Gabril v. Asvador nâm zimmî bi’l-münâsafa taht-ı tasarruflarında olan medîne-i mezbûrede Selami mahallesinde vâki‘ ma‘lûmü’l-hudûd ve’l-müştemilât bir bâb vakıf menzillerini zevci merkūmun tevkîliyle bi-tarîki’l-vefâ bâ-ma‘rifet-i mütevellî bana ferâğ ve tefvîz eyledikde ben dahi ber-vech-i muharrer tefevvüz ve kabûl edip ba‘dehû menzil-i mezkûru ba‘de’t-tahliye beher şehr yüzer para ücret kavliyle merkūme Hanım Nasrâniye’ye îcâr ve teslîm eylediğimde ol dahi ber-vech-i muharrer ba‘de’l-istîcâr târih-i i‘lâma gelince şühûr-ı mezkûrede icâre-i mezkûreden zimmetinde müctemi‘a olan elli beş guruşdan bâkī on dört guruş ücret ile deyn-i meblağ-ı merkūm iki yüz guruş ki cem‘an iki yüz on dört guruşu merkūme Hanım Nasrâniye’den hâlâ taleb ederim deyü da‘vâ ve merkūme Hanım Nasrâniye dahi ber-vech-i muharrer ikrâr ü i‘tirâf etmeğin mûcebiyle meblağ-ı merkūm iki yüz on guruşun edâsıyla merkūme Hanım Nasrâniye şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 8 min-Şevvâl sene 1204