Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 258 Hüküm no: 262 Orijinal metin no: [23a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadıköy Subaşısı Haseki Mahmud Ağa’nın vârisi olmadan vefat eden Nazlı bt. Gabril’in terekesiyle ilgili davada haksız bulunduğu Ma‘rûz Medîne-i Üsküdar’a tâbi‘ Kādı karyesinde subaşı olup bilâ-vâris fevt olanların terekesini kabza memûr olan Haseki Mahmud Ağa b. Hüseyin nâm kimesne medîne-i mezbûrede mahfil-i bâbda meclis-i şer‘-i hatîrde karye-i mezbûrede mütemekkine iken bundan akdem hâlike olan Nazlı bt. Gabril nâm Nasrâniyenin zevci ve terekesine bi’l-verâse vâzı‘ü’l-yed olan Zorik v. Karabet nâm zimmî muvâcehesinde merkūm Zorik zimmînin zevcesi hâlike-i merkūmenin terekesinin nısfı zevci merkūma ve nısf-ı âharı vâris-i ma‘rûfu olmayıp cânib-i beytü’l-mâle âid ve râci‘ olmuş iken merkūm Zorik zimmî terekenin nısfına bi-gayrı hakkın vaz‘-ı yed etmekle suâl olunup tereke-i merkūmenin nısfından keff-i yed ve bana teslîme tenbîh olunmak matlûbumdur deyü da‘vâ ve merkūm Zorik zimmî cevâbında işbu yedimde olan bir kıt‘a mübâya‘a hücceti nâtıka olduğu üzere târih-i i‘lâm senesi şehr-i Rebî‘ülâhir’in ikinci günü zevcem hâlike-i merkūme Nazlı Nasrâniye hayatında eşyâ-i memlûkesinden dört minder ve iki döşek ve altı çatma yasdık ve iki çit mak‘ad ve iki baş yasdığı ve dört yorgan ve iki köhne entari ve iki hırka ve bir ferâce ve on sahan ma‘a kapak ve üç tencere ma‘a kapak ve bir tâbe ve bir hamam tası ve iki leğen ibrik ve bir kazgan ve bir leğenini bi-safkatin vâhidetin yüz elli guruşa bana bey‘ ve temlik ve teslîm ve semeni mutâlebesinden zimmetimi ibrâ ve ıskāt eyledikde ben dahi ber-vech-i muharrer iştirâ ve temellük ve kabûl etmiş idim deyü ba‘de’d-def‘ ve’l-inkâr merkūm Zorik zimmî eylediği def‘ini udûlden es-Seyyid Mustafa b. Hasan ve Memiş b. Mustafa nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle subaşı-i merkūm Zorik zimmî için bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 25 min-Şa‘bân sene 1204