Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 261 Hüküm no: 267 Orijinal metin no: [23b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Seyyid Süleyman’ın söz verdiği binaların inşaatını tamamlayacağı Ma‘rûz Medîne-i Üsküdar’da Solaksinan mahallesinde sâkin Bağçevân es-Seyyid Süleyman b. es-Seyyid Halil medîne-i mezbûrede mahfil-i bâbda meclis-i şer‘-i hatîrde Ali Ağa b. Ahmed mahzarında mezbûr Ali Ağa mahalle-i mezbûrede vâki‘ ma‘lûmü’l-hudûd şükûfe bağçesinin derûnunda mevcûd gedik ta‘bîr olunur ma‘lûmü’l-aded eşcâr-ı müsmire ile sâir âlât-ı lâzımesini bana iki yüz guruşa bey‘ ve temlik ben dahi iştirâ ve kabûl edip bağçe-i mezkûrenin derûnuna müceddeden bir bağçevân odası ve bir ahır ve bir kuyu dolabı binâ etmek üzere yüz guruş ücret ile bana îcâr ben dahi istîcâr ve kabûl etmiş idim hâlâ zikr olunan oda ve ahır [ve] kuyu dolabını binâdan imtinâ‘ etmekle suâl olunup kıbel-i şer‘den binâya tenbîh olunmak matlûbumdur deyü da‘vâ ba‘de vukū‘ı’l-münâza‘a bâ-vesâtet-i muslihîn târih-i i‘lâmdan on gün tamamında dolabı ve yirmi gün tamamında zikr olunan oda ve âhûru müceddeden binâya ta‘ahhüd ve müdde‘î-i mezbûr dahi râzı olup bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 19 min-Za sene 1204