Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 261 Hüküm no: 268 Orijinal metin no: [23b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Hüdai Vakfı’ndan borc (vefaen) alan Zeliha Hatun’un borcunu ödemesi Ma‘rûz Medîne-i Üsküdar’da vâki‘ merhûm kutbü’l-ârifîn Hüdâî eş-Şeyh es-Seyyid Mahmud Efendi vakfının kāimmakām-ı mütevellîsi Hafız Ali Efendi b. el-Hâc Mustafa medîne-i mezbûrede mahfil-i bâbda meclis-i şer‘-i hatîrde mu‘arrefetü’z-zât Zeliha bt. Mustafa mahzarında mezbûre Zeliha Hatun bin iki yüz bir senesi şehr-i Rebî‘ülâhir’inin on altıncı günü târihiyle müverrah işbu yedimde olan bir kıt‘a deyn temessüğü nâtık olduğu üzere yedimden istikrâz ve kabz ve umûruna sarfla istihlâk eylediği yüz guruşdan bâkī yetmiş guruş deyni mukābelesinde medîne-i mezbûrede Hacce hatun mahallesinde vâki‘ ma‘lûmü’l-hudûd ve’l-müştemilât bir bâb vakıf menzilini vefâen ferâğ ve teslîm etmekle menzil-i mezkûru red ve meblağ-ı bâkī-i merkūm yetmiş guruşu hâlâ bi’t-tevliye taleb ederim deyü ba‘de’d-da‘vâ ve’l-istintâk ve’l-ikrâr mûcebiyle mezbûre Zeliha Hatun menzil-i mezkûru ahz ve meblağ-ı bâkī-i merkūm yetmiş guruşun edâsıyla şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 11 min-Zilka‘de sene 1204