Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 262 Hüküm no: 269 Orijinal metin no: [23b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Yani’nin parmağını yaralayan Aleksan’a açtığı davada sulh olduğu Ma‘rûz Medîne-i Üsküdar’a tâbi‘ Kādı karyesinde mütemekkin Yani v. Yani nâm zimmî medîne-i mezbûrede mahfil-i bâbda meclis-i şer‘-i hatîrde Aleksan v. Gabril nâm zimmî muvâcehesinde merkūm Aleksan zimmî târih-i i‘lâmdan üç ay mukaddem karye-i mezbûrede ekmekçi fırınının tahtasına enser vaz‘ı için demir burgu ile delerken zikr olunan tahtanın ardına elin ile dayan deyü bana emr edip ben dahi elim ile tahtanın ardına dayanıp zikr olunan burgu sağ elimin orta parmağına isâbet ve cerh edip hâlâ amel-mânde olmağla mûcibini taleb ederim deyü eylediği da‘vâsından bâ-tavassut-ı muslihîn on guruş bedel-i makbûza merkūm Aleksan zimmî ile sulh olup zikr olunan parmağının diyetine ve mâ-yuhdesü-minhe müte‘allika âmme-i de‘âvîden merkūm Aleksan zimmînin zimmetini ibrâ ve ıskāt ol dahi ibrâsını kabûl ve kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 16 min-N sene 1204