|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 252 Hüküm no: 351 Orijinal metin no: [51b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Mehmed, Ali ve Fatma’nın babaları Ömer’den intikal eden bağı sattıkları
Vilâyet-i Anadolu’da Arabkir kasabasında olup mahmiye-i İstanbu[l’da] Cebehâne kurbünde odalarında sâkinler olan Mehmed ve Ali ibney Ömer nâm karındaşlar asâleten ve li-ebeveyn kız karındaşları Fâtıma nâm sagīre tarafından mezbûr Mehmed vesâyeten meclis-i şer‘-i hatîr-i lâzımü’t-tevkīrde işbu râfi‘u’l-kitâb Ahmed Bey b. Hasan nâm cündî mahzarında ikrâr-ı tâm ve takrîr-i kelâm edip kasaba-i mezbûre kurbünde Şeyhler deresinde vâki‘ bir tarafdan Eskici Ali bağı ve bir tarafdan Leblebici çeşmesi ve bir tarafdan Anuc çayı ve bir tarafdan Kirechânesi ile mahdûd ve mümtâz olup babamızdan bi-hasebi’l-irsi’ş-şer‘î üçümüze intikāl etmekle mülk-i mevrûsumuz olan bir kıt‘a harâbe bağı mezbûr Ahmed Bey’e ba‘de’l-müzâyede ve inkıtâ‘-ı rağbeti’n-nâs otuz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer üzere iştirâ ve kabûl eyledikden sonra semeni olan meblağ-ı mezbûr otuz esedî guruşu asâleten ve vesâyeten mezbûr Ahmed Bey yedinden tamamen ahz u kabz edip zikrolunan bağ mahallinde tesellüme ve zabta ve tasarrufa mezbûr Ahmed Bey’i teslît eyledik, ba‘de’l-yevm mülk-i müşterâsı olmuşdur, keyfe mâ yeşâ’ mutasarrıf olsun dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu.
Hurrire fi’l-yevmi’l-hâmis aşer min-Cemâziyelâhire li-sene erba‘a ve sittin ve elf.
Şuhûdü’l-hâl: Halil Bey b. İbrahim, Mustafa b. Mehmed, Osman b. ( ), Mustafa efendi b. Ebûbekir, Ebûbekir b. Ali, Ahmed Bey b. Hasan, Molla Mehmed oğlu Ali Bey, Ca‘fer b. Şa‘ban, Pîrî Beşe b. Hüseyin, Ali Beşe b. Abdullah çukadâr ve gayruhum.
|