Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 265 Hüküm no: 275 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Mehmed’in, kiracısı Fatma bt. Abdullah’da kalan eşyasının kendisine iadesi Ma‘rûz Medîne-i Üsküdar’da Hasanağa mahallesinde sâkine mu‘arrefetü’z-zât Fatıma bt. Mehmed nâm hatun medîne-i mezbûrede mahfil-i bâbda meclis-i şer‘-i hatîrde diğer Fatıma bt. Abdullah nâm hatun mahzarında bundan akdem ben mezbûre diğer Fatıma’nın menzilinde sâkine iken eşyâ-i memlûkemden mecmû‘-ı kıymetleri elli guruşa bâliğa altı çatma yasdık ve iki minder ve bir döşek ve iki çit mak‘ad ve bir yorgan ve iki sahan ve iki kapak ve bir tâbe ve iki şamdan ve bir tepsi ve iki tencere ma‘a kapak ve iki entari ve bir sepet sandığım mezbûre diğer Fatıma Hatun yedinde kalmağla teslîmine tenbîh olunmak matlûbumdur deyü da‘vâ ol dahi cevâbında zikr olunan yasdık ve minder ve çit mak‘ad ve sahan ve kapak ve tâbe ve bir şamdan ve sepet sandığı yedinden mevcûde olduğunu ikrâr ü i‘tirâf edip ziyâde eşyâ[yı] inkâr etmeğin müdde‘iye-i mezbûre Fatıma Hatun ziyâde müdde‘âsını isbâtdan ızhâr-ı acz edip talebiyle mezbûre diğer Fatıma Hatun gıbbe’t-tahlîfi’ş-şer‘î mûcebiyle müdde‘iye-i mezbûre Fatıma Hatun ziyâde eşyâ mutâlebesiyle mezbûre diğer Fatıma Hatun’a bilâ-beyyine mu‘ârazadan ba‘de’l-men‘ mezbûre diğer Fatıma Hatun’un mertebe-i ikrârı olan eşyâ-i mezkûreyi müdde‘iye-i mezbûre Fatıma Hatun’a edâsıyla şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 2 min-Zilhicce sene 1204