Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 266 Hüküm no: 276 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihrimah Sultan Vakfı’na ait bazı arazilerin Şeyh Mansur Zaviyesi Vakfı’na ait olduğu iddiasının reddedildiği Ma‘rûz Sâdır olan fermân-ı âlîlerine imtisâlen kıbel-i şer‘den memûr Harîrîzâde Mehmed Esad Efendi dâ‘îleri ve Evkāf müfettişi müderrisîn-i kirâmdan fazîletlü es-Seyyid Ahmed Efendi tarafından müte‘ayyin Hızırzâde Mehmed Hayrullah Efendi nezâret-i hazret-i sadrazamîde âsûde evkāfdan merhûme ve mağfûrun-lehâ Mihrimah Sultan Vakfı arâzisinden medîne-i Üsküdar’a tâbi‘ Nerdubânlı karyesinde kâin zikri âtî münâza‘un-fîhâ arâzi üzerine varıp mazbûtü’l-esâmî Müslimîn huzûrlarında bi’l-ma‘iye akd-i meclis-i şer‘-i şerîf ettiklerinde karye-i mezbûrede vâki‘ merhûm Şeyh Mansur Zâviyesi’nin şeyhi sâhib-i arzuhâl el-Hâc Mehmed Tâhir b. Ali nâm kimesne meclis-i ma‘kūd-ı mezkûrda vakf-ı mûmâ-ileyhâ mütevellîsi Ali Bey b. İbrahim tarafından ber-vech-i âtî vekîl olduğu Mehmed Efendi b. Ahmed ve Osman Ağa b. Abdurrahman nâm kimesneler şehâdetleriyle sâbit olan diğer Osman Ağa b. Hasan nâm kimesne mahzarında karye-i mezbûre hâricinde vâki‘ işbu üzerinde akd-i meclis-i şer‘ olunan Katırparası demekle meşhûr bir kıt‘a tarla ve yine tekye budamalığı demekle ma‘rûf tarla ve yine Yüğrükbaba demekle arîf tarla ve yine Tekye harmanlığı ta‘bîr olunur tarla ve yine Yemli ta‘bîr olunur tarla ve yine tekye-i mezbûre kurbünde Bağ tarlası demekle meşhûr tarla ve yine Yüğrükbaba kurbünde vâki‘ Göztepe tarlası demekle arîf tarla ve yine karye deresi kurbünde kâin Tekye çayırı demekle ma‘rûf bir kıt‘a çayır ve yine tekye-i mezkûre kurbünde vâki‘ bir mikdâr enginarlık ve havuz ve sofa ki tahmînen yüz elli keyl tohum istî‘âb eder yedi kıt‘a tarla ve bir kıt‘a çayır ve mârrü’z-zikr enginarlık ve havuz ve sofa ez-kadîm Şeyh Mansur Zâviyesi Vakfı arâzisinden olup zâviye-i mezbûrede zâviyedâr olanlar zabt ü tasarruf ve hâsılâtından âyende ve revende it‘âm-ı ta‘âm oluna gelmiş iken mütevellî-i müvekkil-i mezbûr arâzi-i mezkûreye bi-gayrı hakkın müdâhale eder suâl olunup müdâhalesi men‘ ü def‘ olunmak matlûbumdur deyü da‘vâ ve vekîl-i mezbûr cevâbında arâzi-i mezkûre bâ-temliknâme-i hümâyûn ve ber-mantûk-ı vakfiye-i ma‘mûlün-bihâ hudûdu dâhilinde merhûme-i mûmâ-ileyhâ vakfı arâzisinden olup hattâ müdde‘î-i mezbûr el-Hâc Mehmed Tâhir târih-i i‘lâmdan beş sene mukaddem Rumeli Kadıaskeri olan izzetlü sa‘âdetlü Dürrîzâde Mehmed Ârif Efendi hazretleri tarafından müvellâ ta‘yîn olunan Haşimzâde Mehmed Ataullah Efendi ve Evkāf müfettişi tarafından ta‘yîn olunan Ebûbekir Efendi huzûrlarında arâzi-i mezkûreyi zâviye-i mezbûre arâzisinden olduğunu iddi‘â eyledikde mütevellî-i mezbûr dahi arâzi-i mezkûre merhûme-i mûmâ-ileyhâ vakıf arâzisinden olup ez-kadîm vakf-ı mûmâ-ileyhâ tarafından zabt ü tasarruf olunageldiğini kizb üzerine tevâti’leri müsteb‘ad olan kırk iki nefer kimesneler şehâdetleriyle mezbûr el-Hâc Mehmed Tâhir muvâcehesinde şöhret-i şâyi‘a ile isbât etmeğin mûcebiyle müdde‘î-i mezbûr el-Hâc Mehmed Tâhir bî-vech mu‘ârazadan men‘ olunmuş idi deyü takrîr-i meşrûhuna mutâbık tuğrâ-yı garrâ ile mu‘anven bir kıt‘a emr-i âlî-şân ibrâzıyla def‘-i şer‘î eyledikde müdde‘î-i mezbûr el-Hâc Mehmed Tâhir dahi mazmûn-ı emr-i âlîyi ikrâr ü i‘tirâf etmeğin bu sûretde bir kere şer‘le fasl ü hasm olunan da‘vânın tekrar istimâ‘ı câiz olmayıp ve meşhûr ve mütevâtirin hilâfına ikāmet olunan beyyine dahi makbûle olmamağla mûcebince müdde‘î-i mezbûr el-Hâc Mehmed Tâhir arâzi-i mezkûreye müdâhalesi kemâ-fi’l-evvel men‘ olunduğunu ba‘de’l-inhâ mübâşiri çavuş kulları iltimâsıyla huzûr-ı âlîlerine i‘lâm olundu. Fî 5 min-Zilhicce sene 1204