Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 271 Hüküm no: 284 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Hacı Mehmed Ağa’ya ait olup kaçan kölesini yanında bulunduran Üsküdar Ustası’nın kendisine iadesi Ma‘rûz Medîne-i Üsküdar hâricinde Seyyid Ahmed Deresi kurbünde İbrahimağa Zâviyesi karyesinde sâkin Bostanî el-Hâc Mehmed Ağa b. es-Seyyid Ahmed nâm kimesne medîne-i mezbûrede mahfil-i bâbda meclis-i şer‘-i hatîrde Üsküdar ustası ve zikri âtî câriyeye âbıka olmak üzere bi’l-emâne vâzı‘ü’l-yed olan el-Hâc Ali Ağa b. Mehmed tarafından vekîl-i şer‘îsi Mehmed Ağa b. Ali mahzarında işbu hâzıratü bi’l-meclis orta boylu açık kaşlı Zenciyyetü’l-asl Müslimetü’l-mille Hadice bt. Abdullah nâm câriye yedimde mülküm iken târih-i i‘lâmdan bir gün mukaddem mülkümden ibâk edip hâlen mezbûrun yedinde bulmamla bi’l-istihkāk taleb ederim deyü da‘vâ ve vekîl-i mezbûr cevâbında fi’l-hakīka câriye-i mezkûreye âbıka olmak üzere müvekkil-i mezbûrun bi’l-emâne vaz‘-ı yedini ikrâr ve müdde‘î-i mezbûrun mülkü olduğunu inkâr etmeğin müdde‘î-i mezbûr ber-vech-i muharrer müdde‘âsını udûlden el-Hâc Mustafa Ağa b. el-Hâc Ahmed ve Bostanî Hasan Ağa b. İbrahim nâm kimesneler şehâdetleriyle vech-i şer‘î üzere muvâcehesinde ba‘de’l-isbât ve’t-tahlîf mûcebiyle zikr olunan câriyeyi müdde‘î-i mezbûr Bostanî el-Hâc Mehmed Ağa’ya teslîme vekîl-i mezbûr Mehmed’e tenbîh olunduğu bi’l-iltimâs huzûr-ı âlîlerine i‘lâm olundu. Fî 15 min-Zilka‘de sene 1204