Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 271 Hüküm no: 285 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanparsum v. Avanis’in, Arakil v. Agop’a alacak iddiasıyla açtığı davayı ispat edemediği Ma‘rûz Medîne-i Üsküdar’da Yenimahalle’de mütemekkin Hanparsum v. Evanis nâm zimmî medîne-i mezbûrede mahfil-i bâbda meclis-i şer‘-i hatîrde Arakil v. Agop nâm zimmî muvâcehesinde merkūm Arakil târih-i i‘lâmdan bir buçuk sene mukaddem yedimden istikrâz ve kabz ve umûruna sarfla istihlâk eylediği altmış beş guruş hakkımın otuz dört guruşunu yedinden ahz ü kabz ve bâkī otuz bir guruş zimmetinde hakkım olmağla taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm Hanparsum zimmî ber-vech-i muharrer müdde‘âsını isbâta kādir olamayıp tahlîfe dahi tâlib olmamağla mûcebiyle müdde‘î-i merkūm Hanparsum zimmî da‘vâ-yı mezkûresiyle merkūm Arakil zimmîye bilâ-beyyine mu‘âraza[dan] men‘ olunduğu bi’l-iltimâs huzûr-ı âlîlerine i‘lâm olundu. Fî 7 min-Z sene 1204