Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 273 Hüküm no: 288 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marya bt. İstori ile çocuklarının arsalarına bina yapmasına izin vermeyen komşuları Vasilaki ile anlaştıkları Ma‘rûz Sâdır olan fermân-ı âlîlerine imtisâlen kıbel-i şer‘-i şerîfden mürsel Abdullah Efendi dâ‘îleri Hâssa mi‘mârlarından es-Seyyid Mustafa ve Süleyman halîfeler ve sâir ümenâ-i şer‘-i şerîf ile Medîne-i Üsküdar’a tâbi‘ Kuzguncuk karyesinde vâki‘ sâhibe-i arzuhâl Vasilaki bt. Panayot nâm Nasrâniyenin mülkü olan menzile varıp mazbûtü’l-esâmî Müslimîn huzûrlarında akd-i meclis-i şer‘-i şerîf ettikde merkūme Vasilaki Nasrâniyenin oğlu ve tarafından ber-vech-i âtî vekîl olduğu şahs-ı merkūmeyi bi’l-ma‘rifeti’ş-şer‘iye ârifân Dimitri v. Todori ve Mihal v. Dimitri nâm zimmîler şehâdetleriyle sâbit olan Todori v. Yuvan nâm zimmî meclis-i ma‘kūd-ı mezkûrda câr-ı mülâsıkı olup kendi nefsinden asâleten ve sadrî sagīr oğulları Yorgi ve İstiko’nun tesviye-i emirlerine vasîyy-i mansûbeleri olan şahsı mu‘arrefe Marya bt. İstori nâm Nasrâniye muvâcehesinde vasîyy-i merkūmenin zevci olup bundan akdem hâlik olan Yani nâm zimmîden müntakil sagīrân-ı merkūmân ile vasîyy-i merkūmenin mülk-i mevrûsları olan menzillerini vasîyy-i merkūme bu esnâda hedm ve müceddeden binâya mübâşeret edip lâkin menzil-i mezkûra muttasıl işbu mu‘âyene olunan anam müvekkile-i merkūmenin ma‘lûmü’l-hudûd ve’l-müştemilât menzilinin sokak kapısı kurbünde mi‘mârân-ı mezbûrânın mesâhalarıyla tûlen ve arzen bi-hesâbı terbî‘î on sekiz buçuk zirâ‘ altı parmak arsasının havasına bi-gayrı hakkın fuzûlî binâ ihdâsına mübâşeret etmekle men‘ ü def‘ olunmak bi’l-vekâle murâdımdır deyü da‘vâ ve vasîyy-i merkūme cevâbında fi’l-hakīka arsa-i mezkûre müvekkile-i merkūmenin mülkü olup lâkin ez-kadîm arsa-i mezkûre havasında bizim menzilimiz binâsı olduğuna binâen ben dahi kemâ-fi’l-evvel binâ ve tecdîdine mübâşeret ve havası bizim mülkümüzdür deyü def‘e tasaddî ve vekîl-i merkūm dahi bi’l-külliye inkâr edip vasîyy-i merkūme def‘ini isbât edemeyip ve müvekkile-i merkūmenin dahi yemîn edeceği muhakkak olmağla sulh sagīrân-ı merkūmân hakkında her vechile enfa‘ ve evlâ olduğuna binâen beynlerinde ba‘de vukū‘ı’l-münâza‘a bâ-tavassut-ı muslihîn vekîl-i merkūm Todori zimmî zikr olunan arsanın havası’çün bi-tarîki’s-sulh vasîyy-i merkūma elli guruş def‘ ü teslîm vasîyy-i merkūme dahi asâleten ve nef‘an li’s-sagīr vesâyeten ahz ve arsa-i mezkûre havasından kasr-ı yed etmeğin fîmâ-ba‘d arsa-i mezkûre havasında vasîyy-i merkūme ile sagīrân-ı merkūmânın aslâ alâka ve medhalleri kalmayıp zikr olunan arsa havasına müte‘allika âmme-i de‘âvîden dahi müvekkile-i merkūme Vasiliki Nasrâniyenin zimmetini bi’l-asâle ibrâ ve ıskāt edip kat‘-ı münâza‘a eyledikleri ba‘de’l-inhâ huzûr-ı âlîlerine i‘lâm olundu. Fî 15 min-Zilhicce sene 1204