Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 274 Hüküm no: 289 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Hacı Hüseyin’in, Hafız Hacı Mehmed b. Abdullah’a açtığı alacak davasında iki tarafa iddialarını ispat etmek için mühlet verildiği Ma‘rûz Medîne-i Üsküdar’da Arakıyeci el-Hâc Cafer mahallesi sükkânından sâhib-i arzuhâl İsmail b. el-Hâc Hüseyin medîne-i mezbûrede mahfil-i bâbda meclis-i şer‘-i hatîrde arzuhâlde ismi mezkûr Hafız el-Hâc Mehmed b. Abdullah mahzarında medîne-i mezbûre sükkânından müteveffâ es-Seyyid Mustafa zimmetinde cihet-i deyn-i şer‘îden dört yüz guruş hakkımı taleb ve da‘vâ ve ahz ü kabz ve bana îsâl ve teslîme mezbûr Hafız el-Hâc Mehmed’i tarafımdan vekîl nasb eylediğimde ol dahi meblağ-ı merkūm dört yüz guruşu bi’l-vekâle ahz ü kabz ve üç yüz guruşunu bana def‘ ü teslîm ve yüz guruşunu kendi umûruna sarfla istihlâk edip hattâ bundan akdem meblağ-ı merkūm yüz guruşu mezbûr Hafız el-Hâc Mehmed’den taleb eylediğimde meblağ-ı merkūm yüz guruşu kendi umûruna sarfla istihlâkini ikrâr ve edâya ta‘ahhüd ve meblağ-ı merkūm zimmetinde bana deyni olmak üzere yedime bir kıt‘a temessük dahi i‘tâ etmekle meblağ-ı merkūm yüz guruş ile bi’d-defa‘ât yedimden iktirâz ve kabz eylediği seksen guruş ki cem‘an yüz seksen guruş zimmetinde hakkım olmağla taleb ederim deyü da‘vâ ve mezbûr Hafız el-Hâc Mehmed cevâbında fi’l-hakīka müdde‘î-i mezbûr tarafından vekâleten dört yüz guruş kabz ve üç yüz guruşunu teslîm ve yüz guruşu kendi umûruna sarfla istihlâkini ve deyni olmak üzere temessük verdiğini ikrâr lâkin ba‘dehû meblağ-ı merkūm yüz guruşu dahi müdde‘î-i mezbûra edâ ve teslîm etmiş idim deyü def‘-i şer‘î birle ziyâde müdde‘âsı olan seksen guruşu inkâr etmeğin müdde‘î-i mezbûr ziyâde müdde‘âsını ve mezbûr Hafız el-Hâc Mehmed def‘-i mezkûrunu herbiri isbâta havâle olunup henüz da‘vâlarına faysal verilmediği cerîdede mazbût olup sâdır olan fermân-ı âlîlerine imtisâlen huzûr-ı âlîlerine i‘lâm olundu. Fî 21 min-Zilhicce sene 1204