Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 279 Hüküm no: 300 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yaşları küçük olup nikâhlanan Mehmed Arif ile Esma’nın nikâhlarının iptali Ma‘rûz Medîne-i Üsküdar’da Ahmedçelebi mahallesi sükkânından olup on bir yaşında olup cüssesinin bulûğa tahammülü olmayan Mehmed Ârif b. Hüseyin nâm sagīrin tesviye-i umûruna kıbel-i şer‘den bâ-hüccet-i şer‘iye mansûb vasîsi olan el-Hâc Mustafa b. Mehmed Tâhir nâm kimesne medîne-i mezbûrede mahfil-i bâbda meclis-i şer‘-i hatîrde Esma bt. Ali nâm sagīrenin babası ve velîsi mezbûr Ali tarafından ber-vech-i âtî vekîl olan Molla Ahmed b. Veli nâm kimesne mahzarında vasîsi olduğum sagīr-i mezbûr Mehmed Ârif’in evliyâsından kimesnesi olmayıp velâyet-i tezvîci ancak hâkimü’ş-şer‘a müfevvez iken mezbûr Molla Ahmed târih-i i‘lâmdan iki gün mukaddem sagīre-i mezbûreyi babası mezbûr Ali tarafından vekâleten sagīr-i mezbûr Mehmed Ârif’e yüz elli guruş mehr-i müeccel tesmiyesiyle tezvîc eyledim sagīr-i mezbûr dahi bizzât tezevvüc eyledi deyü sagīr-i mezbûr Mehmed Ârif’i menziline alıp imsâk ve emlâkinden bir sîmli hançerini dahi ahz etmekle suâl olunup sagīr-i mezbûrdan keff-i yed ve zikr olunan hançerini bana teslîme tenbîh olunmak bi’l-vesâye matlûbumdur deyü da‘vâ ve vekîl-i mezbûr Molla Ahmed cevâbında sagīr-i mezbûr Mehmed Ârif ben on altı yaşında olup hâlâ bâliğ oldum deyü bulûğunu mu‘terif oldukdan sonra ben dahi sagīre-i mezbûre Esma’yı babası mezbûr Ali tarafından vekâleten mehr-i mezkûr ile sagīr-i mezbûr Mehmed Ârif’e tezvîc edip ol dahi tezevvüc ve kabûl ve zikr olunan hançeri mehr-i mu‘accel mukābelesinde ahz etmiş idim deyü ikrâr ü i‘tirâf edip lâkin sagīr-i mezbûr Mehmed Ârif el-yevm on bir yaşında olup ve cüssesinin dahi bulûğa tahammülü olmadığından mâ‘adâ bulûğunu dahi i‘tirâf etmeyip ve bulûğunu i‘tirâf eylediği sûretde dahi şer‘an tasdîk olunmayıp zâhir-i hâl vekîl-i mezbûru tekzîb etmekle mûcebiyle nikâh-ı mezkûr sahîh olmayıp bâtıl olmağla vekîl-i mezbûrun makbûzu olan hançeri vasîyy-i mezbûra teslîme vekîl-i mezbûr Molla Ahmed’e tenbîh olunduğu bi’l-iltimâs huzûr-ı âlîlerine i‘lâm olundu. Fî 27 min-Zilhicce sene 1204