Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 279 Hüküm no: 301 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah’ın, Nefise bt. İsmail’e ödünç verdiği eşyalarının iade edilmesi Ma‘rûz Mahmiye-i İslâmbol’da Kazgancılar mahallesinde sâkine ve zâtı mu‘arrefe Hadice bt. Abdullah nâm hatun medîne-i Üsküdar’da mahfil-i bâbda meclis-i şer‘-i hatîrde kezâlik zâtı mu‘arrefe Nefise bt. İsmail nâm hatun mahzarında eşyâ-i memlûkemden üç minder ve on çatma yasdık ve üç çuka mak‘ad ve iki koltuk yasdığı ve bir orta keçesi ve bir seccâde ve bir kapı perdesi ve bir döşek ve bir şilte ve iki yorgan ve iki yüzyasdığı ve bir döşek çârşebi ve bir destâr örtüsü ve beş kat câmeşûy ve bir gümüş kuşak ve iki entari ve bir hırka ve bir şal cebe ve iki mücessem yemeni ve bir köhne şalvar ve bir ferâce ve iki çevre ve iki don ve bir ferâcemi bundan akdem âriyet tarîkıyla mezbûre Nefise Hatun’a teslîm edip hâlâ eşyâ-i mezkûrenin a‘yânı yedinde olmağla taleb ederim deyü da‘vâ ve mezbûre Nefise Hatun cevâbında eşyâ-i mezkûreyi ahz ve hâlâ a‘yânı yedinde olduğunu ikrâr lâkin âriyet tarîkıyla vermeyip müdde‘iye-i mezbûreye bundan akdem üç sene hizmet edip hizmetimin ecr-i misli mukābelesinde vermiş idi deyü ba‘de’d-def‘ ve’l-inkâr mezbûre Nefise def‘-i mezkûrunu isbâtdan âcize olup istihlâf etmeğin müdde‘iye-i mezbûre ba‘de’t-tahlîfi’ş-şer‘î mûcebiyle eşyâ-i mezkûreyi müdde‘iye-i mezbûreye teslîme mezbûre Nefise Hatun’a tenbîh olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 22 min-Zilhicce sene 1204