Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 281 Hüküm no: 305 Orijinal metin no: [27a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çoban Marin’in kaybettiği iki koyununu elinde bulunduran Kostanti’nin koyunları sahibine iade etmesi Ma‘rûz Çoban tâifesinden Marin v. Ustoyan nâm zimmî medîne-i Üsküdar’da mahfil-i bâbda meclis-i şer‘-i hatîrde Kostanti v. Yani nâm zimmî muvâcehesinde işbu mu‘âyene olunan on dört guruş kıymetli iki aded Karaman koyunları yedimde mülküm iken târih-i i‘lâmdan iki gün mukaddem mülkümden zâyi‘ olup merkūm Kostanti zimmînin yedinde bulmamla bi’l-istihkāk taleb ederim deyü da‘vâ ve merkūm Kostanti zimmî cevâbında fi’l-hakīka zikr olunan koyunları ismi ma‘lûmum olmayan bir kimesneden bir gün mukaddem sekiz guruş semen-i medfû‘ ve makbûza iştirâ ve kabz etmiş idim deyü vaz‘-ı yedini ikrâr lâkin müdde‘î-i merkūmun mülkü olduğunu inkâr etmeğin müdde‘î-i merkūm ber-vech-i muharrer müdde‘âsını udûlden Niko v. İstiko ve diğer Niko v. Marko nâm zimmîler şehâdetleriyle vech-i şer‘î üzere muvâcehesinde ba‘de’l-isbât ve’t-tahlîf zikr olunan koyunları müdde‘î-i merkūma teslîme merkūm Kostanti zimmîye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 6 min-Zilhicce sene 1204