Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 282 Hüküm no: 306 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’ın Aşcıbaşı mahallesi ahalisinin uygunsuz hareketlerde ısrar eden Hatice bt. Osman’ın mahalleden ihraç edilmesini talep ettikleri Ma‘rûz Medîne-i Üsküdar’da Aşcıbaşı mahallesi imâmı vekîli Hafız Mehmed Salih Efendi b. Abdülhannan ve ahâlisinden Mustafa b. Ahmed ve Mehmed b. el-Hâc Mustafa ve Ahmed b. Mehmed ve Terzi Süleyman Beşe b. Ahmed ve Osman Ağa b. Ahmed ve Molla Yahya b. Veli nâm kimesneler ile nisâ tâifesinden zâtları mu‘arrefe Tevhide bt. Ahmed ve Âişe bt. Mehmed ve Emine bt. İbrahim nâm hatunlar medîne-i mezbûrede mahfil-i bâbda meclis-i şer‘-i hatîrde kezâlik zâtı mu‘arrefe Hadice bt. Osman nâm hatun muvâcehesinde mezbûre Hadice kendi hâlinde olmayıp dil-âzâr ve bî-edeb ve hadîdetü’l-lisân olup herbirimize şütûm-ı galîza ile şetm etmek âdet-i müstemirresi olmağla bi’d-defa‘ât kendiye nush ü pend eylediğimizde mütenassıha ve mütenebbihe olmayıp ef‘âl-i kabîhasında ısrâr etmekle mezbûre Hadice’den bi’l-külliye emn ü rahatımız meslûb olmuşdur deyü sû’-i hâlini muvâcehesinde ihbâr ve mahalle-i mezbûreden ihrâc olunmak bâbında fermân-ı âlîleri sudûrunu herbiri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 7 min-M sene 1205