Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 282 Hüküm no: 307 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tablakâr Hacik’e ekmek bedelinden borcu olan Mardıros v. Agop’un borcunu ödemesi Ma‘rûz Medîne-i Üsküdar’da Eskihamam kurbünde ekmekçi fırınında tablakâr tâifesinden Hacik v. Artin nâm zimmî medîne-i mezbûrede mahfil-i bâbda meclis-i şer‘-i hatîrde Mardıros v. Agop nâm zimmî muvâcehesinde merkūm Mardıros zimmî bundan akdem yedimden iştirâ ve kabz eylediği nân-ı azîz semeninden bâkī otuz iki guruş otuz iki para hakkımın dokuz buçuk guruşunu yedinden ahz ü kabz ve yirmi dört guruş on iki parası zimmetinde bâkī kalmağla taleb ederim deyü da‘vâ ve merkūm Mardıros zimmî cevâbında müdde‘î-i merkūma cihet-i mezkûreden ancak yirmi üç guruş on iki para deyni olduğunu ikrâr ziyâde bir guruşunu inkâr etmeğin müdde‘î-i merkūm ziyâde müdde‘âsını isbâta kādir olamayıp talebiyle merkūm Mardıros zimmîye yemîn teklif olundukda yemînden nükûlüyle sâbit olmağın mûcebiyle meblağ-ı bâkī-i merkūm yirmi dört guruş on iki paranın edâsıyla merkūm Mardıros zimmî şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 17 min-Zilhicce sene 1204