Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 283 Hüküm no: 308 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sipahi Molla Ali’nin haksız yere gasp edildiği iddiasındaki değirmen davasında sulh olduğu Ma‘rûz Fi’l-asıl Vilâyet-i Rumeli’nde Karlıili sancağında İvlahor kazâsına tâbi‘ Ermiçe karyesi ahâlisinden olup hâlâ mahmiye-i İslâmbol’da Sultan Mehmed Han aleyhi’r-rahmeti ve’l-gufrân câmi‘-i şerîfi medresesinde sâkin sâbi-i arzuhâl Sipâhî Molla Ali b. Mehmed nâm kimesne medîne-i Üsküdar’da mahfil-i bâbda meclis-i şer‘-i hatîrde medîne-i mezbûreye tâbi‘ Kādı karyesinde sâkin derûn-ı arzuhâlde mezkûr Yanyalı Ahmed Sipâhî b. Ali nâm kimesne mahzarında sâlifü’z-zikr İvlahor kazâsı ahâlisinden gāib ani’l-beled Mehmed Bey b. Ömer Bey kazâ-i mezbûrda nehr-i Ermiçe üzerinde dâir -mu‘addün li’l-istiğlâl olan bir bâb su değirmeni gasben ahz ve on üç sene bi-gayrı hakkın tasarruf edip ben dahi târih-i i‘lâmdan bir buçuk sene mukaddem mezbûr Mehmed Bey’e mahmiye-i İslâmbol’da zafer bulup değirmen-i merkūmun beher keyli ikişer guruş kıymetli senevî üç yüz keyl buğdaydan sinîn-i mezkûrede lâzım gelen ecr-i mislini taleb ve da‘vâya mübâşeret eylediğimde beynimize muslihûn tavassut edip beni da‘vâ-yı mezkûremden mezbûr Mehmed Bey ile altı bin guruş üzerine sulh eylediklerinde herbirimiz sulhu kabûl ve bedel-i sulh-ı merkūm altı bin guruş hakkımın edâsına mezbûr Ahmed Sipâhî kefîl ve dâmin olmağla kefâletine binâen meblağ-ı merkūmu mezbûr Ahmed Sipâhî’den taleb ederim deyü da‘vâya tasaddî etmiş idim el-hâletü hâzihî beynimize muslihûn tavassut edip mezbûr Sipâhî Ahmed mâlından teberru‘an bana otuz guruş def‘ ü teslîm ettikde ben dahi yedinden ahz ü kabz edip mezbûr Ahmed Sipâhî’yi kefâlet-i mezkûreden ihrâc ve tasaddî eylediğim kefâlet da‘vâsına müte‘allika âmme-i de‘âvîden mezbûr Sipâhî Ahmed’in zimmetini ibrâ ve ıskāt ol dahi bana medfû‘u olan meblağ-ı merkūm otuz guruşa müte‘allika da‘vâdan benim zimmetimi ibrâ ve ıskāt ve herbirimiz âharın ber-vech-i muharrer ibrâsını kabûl edip kat‘-ı münâza‘a eylediklerini mezbûr Sipâhî Ahmed tasdîk etmeğin mübâşiri çavuş kulları iltimâsıyla huzûr-ı âlîlerine i‘lâm olundu. Fî 9 min-Muharremi’l-harâm sene 1205