Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 284 Hüküm no: 311 Orijinal metin no: [27b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi ve simitçi esnafının nizamlarına aykırı hareket ettiğini şikâyet ettikleri Pehlivan Mustafa’nın nizama aykırı hareket etmemeyi taahhüt ettiği Ma‘rûz Medîne-i Üsküdar’da çörekçi ve simidci esnâfının kethudâları Ahmed b. Mehmed ve yiğitbaşıları Molla Ali b. Süleyman ve ustalarından Abdurrahman b. İbrahim ve Abdullah b. Ahmed ve es-Seyyid Ahmed b. Mehmed ve İbrahim b. Mehmed ve Abdullah b. Mehmed [ve] Receb Beşe b. Musa nâm kimesneler medîne-i mezbûrede mahfil-i bâbda meclis-i şer‘-i hatîrde medîne-i mezbûrede Eskihamam ittisâlinde çörekçi ve simidci olan Pehlivan Mustafa b. Hüseyin nâm kimesne muvâcehesinde mezbûr Pehlivan Mustafa beynimizde mer‘î ve mu‘teber olan nizâm-ı kadîmimiz üzere hareket etmeyip fırınında tabh eylediği simid ve çöreği fırınında tablakârlarıyla ibâdullâha bey‘e kanâ‘at etmeyip bir zimmî tablakâr tedârik ve francalacı misillü küfe ile esvâkda geşt ü güzâr ve küfesi içinde memnû‘ olan francala simidi bulunup nizâm-ı kadîmimizin ihtilâline bâdî olmağla mezbûra bi’d-defa‘ât nush ü pend eylediğimizde mütenassıh olmayıp ef‘âl-i sâbıkāsında ısrâr ve bizlere itâ‘at etmemekle mezbûrdan emniyetimiz meslûb olmuşdur deyü mugāyir-i nizâm-ı kadîm harekâtını muvâcehesinde ihbâr etmeleriyle ve beynlerinde münâza‘ât-ı kesîre vâkı‘a olmuş idi el-hâletü hâzihî mezbûr Pehlivan Mustafa fîmâ-ba‘d fırınında küfeli tablakâr istihdâm etmeyip ve ustalarına itâ‘at birle mugāyir-i nizâm hareket etmemek üzere ta‘ahhüd ve bu vechile beynleri ıslâh olunup kat‘-ı [münâza‘a] eyledikleri bi’l-iltimâs huzûr-ı âlîlerine i‘lâm olundu. Fî 15 min-Zilhicce sene 1204