Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 286 Hüküm no: 313 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa ile hizmetçisi İsmail’in birbirlerinde olan alacak-verecek davasında sulh oldukları Ma‘rûz Medîne-i Üsküdar’a tâbi‘ Çenger karyesinde sâkin Ahmed Ağa b. Abdullah medîne-i mezbûrede mahfil-i bâbda meclis-i şer‘-i hatîrde İsmail b. Halil mahzarında mezbûr İsmail bundan akdem beher şehr dörder guruş ücret kavliyle dört ay hizmetimde olup esnâ-yı hizmetinde ücretine mahsûben yedimden makbûzu olan yirmi yedi buçuk guruşu ve emlâkımdan yedi guruş kıymetli bir şalı âriyet tarîkıyla yedimden ahz ve hâlâ hizmetimden müfârakat etmekle nakden yedimden makbûzu olan yirmi yedi buçuk guruşun on altı guruşu şühûr-ı mezkûrede müstahak olduğu on altı guruşa ba‘de’l-mahsûb mâ‘adâ on bir buçuk guruş hakkım ile zikr olunan şalı taleb ederim deyü ba‘de’d-da‘vâ ve vukū‘ı’l-münâza‘a beynlerine muslihûn tavassut edip mezbûr İsmail zikr olunan şalı müdde‘î-i mezbûra redd ü teslîm eyledikde ol dahi ahz ü kabz ve ziyâde müdde‘âsı olan on bir buçuk guruşa müte‘allika âmme-i de‘âvîden mezbûr İsmail’in zimmetini ibrâ ve ıskāt eyledikde ol dahi şühûr-ı mezkûrede hizmetine ve husûs-ı mezkûra müte‘allika âmme-i de‘âvîden müdde‘î-i mezbûrun zimmetini ibrâ ve ıskāt ve herbiri âharın ber-vech-i muharrer ibrâsını kabûl edip kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 14 min-Za sene 1204