Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 286 Hüküm no: 314 Orijinal metin no: [28a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsteryo v. Yorgi’nin Duvarcı Tanaş’ta kalan alacağının ödenmesi Ma‘rûz Medîne-i Üsküdar’a tâbi‘ Kuzguncuk karyesinde mütemekkin İsteryo v. Yorgi nâm zimmî medîne-i mezbûrede mahfil-i bâbda meclis-i şer‘-i hatîrde Tanaş v. Hıristo nâm zimmî muvâcehesinde merkūm Tanaş zimmîye târih-i i‘lâmdan üç sene mukaddem duvarcılıkta hizmet etmek için beher yevm otuzar para ücret tesmiyesiyle nefsimi îcâr eylediğimde ol dahi ba‘de’l-istîcâr ve’l-kabûl merkūm Tanaş zimmîye kırk dokuz gün hizmet etmemle eyyâm-ı mezkûrede müstahak olduğum bin dört yüz yetmiş para hakkımın sekiz yüz otuz parasını yedinden ahz ü kabz ve altı yüz kırk parası zimmetinde bâkī kalmağla taleb ederim deyü da‘vâ ve merkūm Tanaş zimmî cevâbında müdde‘î-i merkūmu ancak yevmî yirmi iki para ücret kavliyle istîcârını ve kırk dokuz gün hizmet eylediğini ikrâr ve ziyâde ücret kavlini inkâr etmeğin müdde‘î-i merkūm ber-vech-i muharrer müdde‘âsını lede’t-tezkiye udûl-ı millet-i Nasârâdan oldukları zâhir olan Tanaş v. Dimitri ve Dimitri v. Varsam nâm zimmîler şehâdetleriyle bi’l-muvâcehe isbât etmeğin mûcebiyle meblağ-ı bâkī-i merkūm altı yüz kırk parayı müdde‘î-i merkūma edâ ve teslîme merkūm Tanaş zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 25 min-Z sene 1204