Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 287 Hüküm no: 315 Orijinal metin no: [28a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Halil’in, boşandığı kocası Mustafa’ya nafaka ve mehir bedelinden kalan alacağının ödenmesi talebiyle açtığı davayı ispat edemediği Ma‘rûz Medîne-i Üsküdar’da Vâlide-i Atik mahallesinde sâkine mu‘arrefetü’z-zât Emine bt. Halil nâm hatun medîne-i mezbûrede mahfil-i bâbda meclis-i şer‘-i hatîrde zevc-i mutallıkı Mustafa b. Mehmed nâm kimesne mahzarında ben mezbûr Mustafa’nın yüz guruş mehr-i müeccel tesmiyesiyle zevce-i medhûlün-bihâsı iken târih-i i‘lâmdan dokuz ay mukaddem beni tatlîk etmekle mehr-i mezkûr yüz guruş ile hîn-i tatlîkde nafaka-i iddet-i ma‘lûme ve meûnet-i süknâm için bi’t-terâzî ta‘yîn olunan on guruş ki cem‘an yüz on guruşun seksen guruşunu yedinden ahz ü kabz ve otuz guruş zimmetinde hakkım bâkī kalmağla taleb ederim deyü da‘vâ ve mezbûr Mustafa cevâbında fi’l-hakīka müdde‘iye-i mezbûre zevce-i medhûlün-bihâsı olup tatlîkini ikrâr lâkin târih-i merkūmda mehr-i mezkûr ile nafaka-i iddet-i ma‘lûmesini benden taleb ve da‘vâ sadedinde iken beynimize muslihûn tavassut edip müdde‘iye-i mezbûre da‘vâ-yı mezkûresinden benim ile doksan guruş bedel-i makbûza sulh olup ziyâde müdde‘âsı olan yirmi guruşa ve hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt ben dahi ibrâsını kabûl etmiş idim deyü ba‘de’d-def‘ ve’l-inkâr mezbûr Mustafa def‘-i mezkûrunu lede’t-tezkiye adâletleri zâhir olan İmâm es-Seyyid İbrahim Efendi b. es-Seyyid Ahmed ve Molla Ahmed b. Mehmed nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle müdde‘iye-i mezbûre da‘vâ-yı mezkûresiyle mezbûr Mustafa’ya bî-vech mu‘ârazadan men‘ olduğu bi’l-iltimâs huzûr-ı âlîlerine i‘lâm olundu. Fî 8 min-Zilhicce sene 1204