Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 400 Hüküm no: 411 Orijinal metin no: [94b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yoseb v. Kiryako’un Kayseri’nin Germir köyündeki ev hissesini kardeşi Marat’a sattığı Medîne-i Kayseriye kazâsına tâbi‘ Görmür [Germir] nâm karye ahâlîsinden olup hâlâ mahmiye-i İstanbul’da Kurşunlu Handa müsâfiren sâkin Yoseb v. Kiryako nâm zimmî meclis-i şer‘-i şerîf-i enverde işbu hâfızü’l-vesîka karındaşı Marat muvâcehesinde ikrâr-ı tâm [ve] takrîr-i kelâm edip akd-i âti’z-zikrin sudûruna değin ale’l-iştirâki’s-seviyy yedimizde şirâen mülk ve hakkımız olup karye-i mezbûrede vâki‘ bir tarafdan İmâm Mehmed Efendi mülkü ve bir tarafdan Yuvan zimmî mülkü ve bir tarafdan Uğurlu nâm zimmî mülkü ve ba‘zan karındaşım Yoseb nâm zimmî mülkü ve bir tarafdan tarîk-i âm ile mahdûd fevkānî bir bâb oda ve tahtânî bir bâb oda ve iki anbar ve bir sofa ve havluyu müştemil mülk menzilde olan nısf hisse-i şâyi‘amı sokak kapısı beynimizde müşterek olmak üzere tarafeynden îcâb ve kabûlü hâvî bey‘-i bâtt-ı sahîh-i şer‘î ile karındaşım mezbûr Marat zimmîye otuz guruşa bey‘ ve temlîk ve mahallinde kabz ve tesellüme taslît eylediğimde ol dahi ber-vech-i muharrer iştirâ ve temellük eyledikden sonra semeni olan meblağ-ı mezbûr otuz guruşu mesfûr Murad zimmî bana def‘ ve teslîm ben dahi yedinden tamamen ahz u kabz eyledim. Fîmâ-ba‘d menzil-i mahdûd-ı mezkûrda kat‘â alâka ve medhalim kalmamışdır. Keyfemâ-yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Mustafa, Mehmed b. Murtaza, Mehmed Efendi el-imâm, Osman Çelebi b. Ahmed, Mehmed b. Abdullah, Mustafa b. Abdullah.